د روسیې ولسمشر ویلادیمیر پوتین د امریکايي سیال دا خبرې رد کړې، چې که مسکو د اوکراین جګړه وګټي، نو پر ناټو به برید وکړي. ښاغلی پوتین وايي، مسکو له ناټو سره جګړې ته لېوال نه دی او جو بایډن په دا ډول څرګندونو سره غواړي، خپله «ناسمه پالیسي توجیه کړي.»
په اوکراین کې جګړې پر ۱۹۶۲ کال له کیوبا توغندیز کړکېچ راهیسې تر بل هر وخت د مسکو او واشنګټن اړیکي خراب کړي دي.
جو بایډن تېر کال وویل، د روسیې او ناټو ترمنځ مخامخ ټکر به دریمې نړیوالې جګړې ته لار برابره کړي.
جو بایډن له اوکراین سره د پوځي مرستو د مخالفت په هکله خبرو کې جمهوریپالو ته وویل، که پوتین د اوکراین جګړه وګټي، نو کرار به نه شي او د ناټو پر هېواد به هم برید وکړي.
خو د روسیې ولسمشر د جو بایډن دغو خبرو ته په اشاره وايي: دا یو مخ احمقانه ده او زه فکر کوم چې بایډن هم پرې پوهېږی.
نوموړی زیاتوي، د امریکا ولسمشر په دا ډول څرګندونو سره خپله ناسمه پالیسي توجیه کول غواړي.
د ویلادیمیر پوتین په خبره، روسیه له ناټو سره د جګړې لپاره نه کومه وجه، نه څه لېوالتیا، نه څه جیو پولیټییک، سیاسي، اقتصادي یا پوځي ګټه لري.
د پوتین په خبره، روسیه او ناټو له یو بل سره د ځمکې دعوه نه لري او مسکو له دې تړون سره اړیکي پراخول غواړي.
