د طالبانو د دفاع وزارت سرپرست وایي، «امریکا په افغانستان کې په خپل شل کلن حضور کې هیڅ کوم داسې بنسټیز کار نه دی کړی چې ګټې یې اوږدمهاله وي.» مولوي محمد یعقوب وايي، له لسیزو راهیسې ختیځوالو او لویدیځوالو هڅه کړې چې د افغانستان د خلکو ترمنځ «بې اتفاقي رامنځته کړي.»
نوموړي د کابل پوهنتون د محصلانو په فراغتغونډه کې زیاته کړه، چې ختیځوال او لویدیځوال هڅه کوي د افغانانو، بیا په ځانګړي توګه په علمي برخه کې د ځوانانو ذهنونه بدل کړي، بیلابیل افکار پکې وارد کړي او ټول سره وشیندي.
د هغه په خبره، ختیځوال او لویدیځوال غواړي خلکو ته دا وښیي چې ملا حکومت کولی نشي او د ملا یې په حکومت کولو څه.
ښاغلی مجاهد وایي،" که ملا، دیني عالم او طالب نه وي دا ټولنه نه جوړیږي او که ډاکټر، انجنیر او پیلوټ هم نه وي، دا هیواد نه جوړیږي."
د طالبانو د ملي دفاع سرپرست وزیر همداراز په نیوکې سره وویل، چې امریکا په افغانستان کې په خپلې شل کلنۍ حضور کې هیڅ کوم داسې بنسټیز کار نه دی کړی چې ګټې یې اوږدمهاله وي.
په دغه غونډه کې د طالبانو د کورنیو چارو سرپرست وزیر، سراجالدین حقاني هم په خپلو خبرو کې وویل، چې افغانستان د داسې زبرځواکونو د «مستعمرې» لاندې شوی و چې نیمه پېړۍ افغانانو خپل فکر او وړتیا هم د نورو لپاره کاروله.
نوموړي سره له دې چې د کوم یوه مشخص هیواد نوم نه دی اخیستی، خو وایي چې دغو زبرځواکونو هیچا ته وطن ته د خدمت کولو اجازه نه ورکوله.
پر افغانستان د طالبانو له واکمنۍ وروسته، سره له دې چې طالبان هره اونۍ له امریکا څخه زرګونه ډالره مرسته ترلاسه کوي خو بیا هم تل په دغه هیواد د لاسوهنې، په افغانستان کې د امریکایانو پر پروګرامو او شل کلن حضور نیوکې کوي.
