د ملګرو ملتونو امنیت شورا د جمعې په ورځ غزې ته د بشردوستانه مرستو د زیاتولو لپاره یو پریکړه لیک تصویب کړ او د جګړې د پای ته رسولو لپاره یې د شرایطو برابرولو هڅه وکړه. له دغه پرېکړه لیک څو ساعته وروسته اسراییل د فلسطین په خاوره خپل ځمکني بریدونه پراخ کړل.
روسيې او امريکا له دغه پرېکړه ليک څخه ډډه وکړه، خو نورو غړو تایید رايه ورکړه.
دغه پریکړه لیک بشردوستانه مرستو ته د بې خنډه لاسرسي د تضمین لپاره د سملاسي اقداماتو غوښتنه کوي او د شخړو د پای ته رسیدو لپاره شرایط برابروي.
متحده ایالات چې د اسراییل اصلي متحد دی، په غزه کې د اوربند غوښتنه ونه منله، خو د اوربند پر ځای د شخړو د پای ته رسولو لپاره د شرایطو رامنځته کول په دغه پریکړه لیک کې اضافه شول.
دغه پریکړه لیک له څو ورځني ځنډه وروسته تصویب شو. دغه څو ورځنۍ ځنډ د امریکا د ویتو د مخنیوي لپاره د خبرو اترو لپاره و.
واشنګټن تر دې مخکې هغه پریکړه لیک ویټو کړ، چې په غزه کې یې د اوربند غوښتنه کړې وه.
د مرګ ژوبلې په تازه راپور کې، د غزې د روغتیا وزارت ویلي چې د اکتوبر له اومې نېټې راهیسې د اسراییل په بریدونو کې ۲۰ زره او ۵۷ فلسطینیان وژل شوي او ۵۳ زره او ۳۲۰ تنه ټپیان شوي دي.
د اسراییل د لومړي وزیر بنیامین نتنیاهو حکومت ژمنه کړې چې حماس به له منځه یوسي، د حماس وسله والو د اکتوبر پر اومه د اسراییل په سوېل په برید کې یوزرو ۲۰۰ کسان ووژل او ۲۴۰ یې یرغمل کړل.
