د طالبانو د پوهنې وزارت ولايتونو ته په لېږلي مکتوب کې ليکلي، په مدرسو کې د وړې دروې فارغانو ته د سندونو دورکړې لړۍ دې ودرول شي. طالبان واک ته په رسېدو تر ډېره په خپلو لیکو کې هغو کسانو ته دندې ورکوې، چې دیني زدکړه یې کړې وې او يا هم د «جهاد» مخينه ولري.
د دندې ترلاسولو لپاره د مدرسو د وړو دورو فارغانو هم سندونه ترلاسول او مختلفو طالبي ادارو کې یې د دندو ترلاسولو هڅه کوله.
افغانستان انټرنشنل ـ پښتو ته د طالبانو د پوهنې وزرات هغه مکتوب رسېدلی، چې دوی خپلو ولایتي ادارو ته لېږلی.
په مکتوب کې لیکل شوي، چې د ديني زدکړو د وړې دورې لپاره د فارغت سندونه دي نه ورکول کيږي
د طالبانو د پوهني وزارت په دې مکتوب کې ليکلي، چې تر ټاکلي وخت مخکې دستار بندئ او غونډې کول هم بند دي.
هڅه مو وکړه، چې په دې اړه د طالبانو نظر هم را واخلو؛ خو دوی ځواب ونه وايه.
ځینې طالب پلوه کسانو خواله رسنیو کې د نوې پرېکړې هرکلي سره هیله ښودلې چې دا مکتوب عملي هم شي.
طالبان واک ته په رسېدو هر کال له ديني مدرسو څخه په سلګونه کسان فارغوي.
دغه ډله په ديني برخه کې د خپلو زدکوونکو لپاره درې دورې لري « منځنۍ، وړه او لويه دوره»، چې پکې فنون، فقه، حدیث او ځینې نور کتابونه تدرسيږي.
د طالبانو په اوسني تعليمي سيسټم کې د دې دورو د فارغينو د زدکړې سطحه د پوهنتون تر فارغينو لوړه ده.
د معلوماتو له مخي، طالبان تر ډېره هغو کسانو ته دندې ورکوي، چې ديني زدکړه یې کړې وي او يا هم له دوی سره یې په جګړه کې برخه اخيستې وي.
