د ایران بهرنیو چارو وزیر د یکشنبې په ورځ د طالبانو بهرنیو چارو وزیر ته وویل چې دغه ډله باید له ایران سره «د اوبو او پولو په ګډون نا حل شوې ستونزې» حل کړي. امیر حسین عبداللهیان هیله څرګنده کړه چې طالبان به له دغه هېواد سره د اختلافاتو د هواري لپاره «عملي ګامونه» واخلي.
د طالبانو بهرنیو چارو وزارت د یکشنبې ورځې د غونډې په اړه په خپل راپور کې د ایراني لوري د غوښتنو یادونه نه ده کړې. بلخوا د دغه وزارت په خبرپاڼه کې ویل شوي، چې دواړو چارواکو د دواړو هېوادونو ترمنځ د ډیپلوماتیکو اړیکو پر پراختیا خبرې وکړې.
ایران تر اوسه پورې د طالبانو حکومت په رسمیت نه پیژني او د دغه هیواد د بهرنیو چارو وزارت په هغه ځای کې چې عبداللهیان د طالبانو له پلاوي سره لیدلي وو، د طالبانو د بیرغ له لګولو ډډه وکړه.
د طالبانو بهرنیو چارو وزیر امیر خان متقي د سې شنبې په ورځ په تهران کې د فلسطین په اړه په نړیواله غونډه کې ګډون وکړ. نوموړي په دغه سفر کې تر اوسه پورې یوازې د ایران بهرنیو چارو له وزیر او ځانګړي استازي سره کتلي دي. د طالبانو بهرنیو چارو وزارت د نورو ګډون کوونکو هېوادونو له چارواکو سره د متقي د ناستې په اړه کوم خبر نه دی خپور کړی.
ایران په وار وار د طالبانو پر حکومت چې تولګډونه یې نه بولي، نيوکې کړې، خو طالبانو د ایران دغه نيوکې بابېزه بللې دي.
ایراني چارواکو په وار وار پر طالبانو د هلمند له سیند څخه د ایران د حقابې نه ورکړې له امله نیوکې کړي، خو طالبانو یې لامل په افغانستان کې د اورښت کموالی بللی دی.
