د افغانستان د ازادۍ جبهې غړو د سې شنبې په ماښام (د مرغومۍ په ۵مه) د بلخ ولایت د مزارشریف ښار د سید اباد په څلور لارې کې د طالبانو د تالاشۍ پر یوې پوستې برید کې ۵ طالبانو ته مرګ ژوبله اړولې.
دې جبهې پر اېکس ټولنیزې شبکې د یوې ویډیو په خپرولو سره لیکلي، چې دا برید د شپې شاو خوا اته بجې ترسره شوی، چې په پایله کې یې درې طالبان وژلي او دوه تنه نور ټپیان دي.
په دغه ۲۸ ثانیې ویډیو کې لیدل کیږي، چې د یو ناپېژاند کس له خوا لاسي بم غورځول کیږي او د اور لمبي پورته کیږي.
د بلخ د امنیې قوماندانۍ ویاند محمد اصف وزیري د پېښې پخلی کوي او وايي، چې چاودنه نن شپه د مزارشریف ښار د اتمې حوزې اړوند د نورخدا په سیمه کې شوې ده.
وزیري د پیښې د نوعیت لاسي بم ښودلی، چې د ناپېژاندو کسانو له خوا غورځول شوی دی. هغه زیاته کړې چې دغه برید کې چاته ځاني او مالي زیان نه دی اوښتی.
