له تېر نومبره تر راتلونکو څلورو میاشتو به ۱۵.۲ مېلیونه افغانان د خوړو له ناامنۍ سره مخ وي
د خوړو نړۍوال پروګرام وايي، د ۲۰۲۳ کال د نومبر او ډسمبر او د ۲۰۲۴ کال په درېیو لومړیو میاشتو کې به ۱۵.۲ مېلیونه افغانان د خوړو له ناامنۍ سره مخامخ وي.
د خوړو نړۍوال پروګرام وايي، د ۲۰۲۳ کال د نومبر او ډسمبر او د ۲۰۲۴ کال په درېیو لومړیو میاشتو کې به ۱۵.۲ مېلیونه افغانان د خوړو له ناامنۍ سره مخامخ وي.
دغه پروګرام وايي، وړاندوینه کېږي چې د ۲۰۲۳ کال له نومبر څخه د ۲۰۲۴ کال تر مارچه ۱۵.۲ مېلیونه افغانان به د خوړو له ناامنۍ سره مخ وي.
دغه سازمان په خپل راپور کې چې تېره ورځ یې خپور کړی، ویلي په دې اړمنو کې ۳.۶ مېلیونه هغه خلک هم شامل دي چې د خوړو د خوندیتوب په بېړني پړاو کې دي.
په راپور کې راغلي، چې ۴ مېلیونه وګړي بیا له سختې خوارځواکۍ سره مخامخ دي چې ۳.۲ مېلیونه یې له پنځو کلونو کم عمره ماشومان دي.
د خوړو نړۍوال پروګرام ویلي، افغانستان لا هم له یو لړ کړکېچونو سره مل دی او بشري وضعیت یې خورا ترینګلی دی.
ځینې اړمن افغانان هم وايي، چې د ژمي سړې سېلۍ رالوتي، دوی سره له دې چې د خپلو کورونو د ګرمولو لپاره سون توکي او ګرمې جامې نه لري، ورسره د خوړو له کمښت څخه هم ځوریږي.
د 'ډبلیو اېف پي' په وروستي راپور کې هم د نورو اړمنو کسانو ترڅنګ د هرات د زلزلو ځپلیو او له ګاونډیو هېوادونو د وروستیو راستنو شویو یادونه هم شوې، چې په وینا یې بشري مرستو ته اړتیا لري.
دغه سازمان دا شان ویلي دي، ۴۰۰ مېلیونه ډالرو ته بېړنۍ اړتیا لري چې په ژمي کې یې د ۷ مېلیونه زیانګالو د ژغورولو لپاره ولګوي.
په افغانستان کې د طالبانو له واکمنېدو وروسته د ملګرو ملتونو په ګډون ګڼو نړۍوالو سازمانونو ویلي، چې په دې هېواد کې ورځ تر بلې بې وزلي او بشري مرستو ته د اړمنو شمېر ډېرېږي.
د ملګرو ملتونو په وینا په ۲۰۲۳ کال کې څه باندې ۲۹ مېلیونو کسانو بشري مرستو ته اړتیا درلوده چې نږدې ۱۶ مېلیونه وګړي په کې په دې نه پوهېدل، چې د بل وخت خواړه له کومې ترلاسه کړي.
