د کابل لپاره د طالبانو د امنیه قومندانۍ ویاند وايي، د دغه ښار دشت برچي کې د سپرلۍ په کاسټر موټر کې د چاودنې له امله دوه کسان وژل شوي او ۱۴ نور ټپیان دي. خالد ځدران ټلیګرام کې زیاتوي، چې ټپیان روغتونونو ته رسول شوي او د پېښې په اړه د دې ډلې د پولیسو له لوري پلټنې روانې دي.
تر دې مخکې د کابل دشت برچي کې سرچینو وویل، ماښام ځايي وخت شپږ بجې او شل دفیقې دغه سیمه کې د سپرلۍ په کاسټر موټر کې چاودنه وشوه.
افغانستان انټرنشنل ته رسېدلې ویډیو کې هم ښکاري چې له کاسټر لمبې پورته کېږي او ټپیان پر ځمکه پراته دي.
ټپیان فریاد کوي او نور ورته د اوبو راوړلو غوښتنه کوي.
ځايي سرچینې وايي، له چاودنې وروسته یې د ډزو غږونه هم اورېدلي دي.
تر اوسه کومې ډلې د دې برید پړه نه ده منلې، خو په تېر کې د ورته چاودنو مسوولیت داعش منلی دی.
