د طالبانو د کانونو او پټرولیم وزارت چارسمبالي وزیر د څلورو شرکتونو له چارواکو سره د لويو کانونو د څلورو ساحو د قراردادونو لاسليکولو په غونډه کې وویل، په پنجشېر کې د زمردو ۱۷۰۰ کانونه پېژندل شوي چې له دې ډلې ۴۵۰ یې د ملاهبت الله په ځانګړي فرمان د دغه ولایت خلکو ته ورکړل شوي دي.
د طالبانو تر کنټرول لاندې د باختر اژانس د راپور له مخې په دې غونډه کې شهاب الدین دلاور زیاته کړه، چې د دغو کانونو ۱۰ سلنه عواید د طالبانو او ۹۰ سلنه یې د خلکو دي او اوسمهال د پنجشېر ۱۰ زره اوسېدونکي په دې برخه کې په مستقیم ډول په کار بوخت دي.
د دوی په وینا، په تېرو څلورو میاشتو کې د څه د پاسه دوه میلیونه ۶۰۰ زره ډالرو په ارزښت، زمرود استخراج او د رسنیو د استازو تر مخې د داوطلبیو له لارې پلورل شوي دي.
نوموړي د امو سېند د نفتي حوزې د استخراج په اړه هم معلومات ورکړل او ویې ویل، چې له «افچین» شرکت سره د قرارداد له مخې په تېر میلادي کال کې ۱۸ څاګانې فعالې شوې چې هره ورځ ۱۱۰۰ ټنه تېل استخراجېږي.
ټاکل شوې ده تر ۲۰۲۵ میلادي کاله پورې په ورځ کې تر ۳۰۰۰ ټنه تېل استخراج شي؛ خو ګڼ کتونکي او شنونکي بیا وايي، چې دمګړۍ دغه کانونه په فني او مسلکي بڼه نه سپړل کېږي او دا هم زیاتوي چې طالبان د خپلو لګښتونو د پوره کولو له پاره د افغانستان کانونه په وړیا توګه لیلاموي او خپله عادي او انکشافي بودجه له دغو لارو پوره کوي.
په تېرو پنځو کلونو کې سینګاپور او جاپان د نړۍ تر ټولو پیاوړي پاسپورټونه درلودل، چې خپلو وګړو ته یې د نورو هېوادونو په پرتله د وېزې پرته ډېرو هېوادونو ته د لاسرسي اجازه ورکوله؛ خو سږ کال ډېر څه بدل شوي دي.
په ۲۰۲۴ کال کې د څلورو اروپایي هېوادونو د پاسپورټ اعتبار لا پسې لوړ شوې او د لیست په سر کې سینګارپور او جاپان سره یو ځای شوي، چې لومړی مقام یې خپل کړی.
د فرانسې، جرمني، ایټالیا او هسپانیې وکړي اوس له ۲۲۷ هېوادونو څخه ۱۹۴ هغو ته له وېزې پرته سفر کولی شي، د دغو هېوادونو شمېر تېر کال ۱۹۱ و.
سویلي کوریا، سوېډن او فنلینډ بیا دوم مقام خپل کړی او وګړي یې کولی شي، چې ۱۹۳ هېوادونو له وېزې پرته سفر ولري.
اتریش، ډنمارک، ایرلینډ او هالنډ بیا درېیم مقام خپل کړی او وګړي یې ۱۹۲ هېوادونو ته پرته له وېزې د سفر اجازه لري.
انګلستان د سږکال په لېست کې څلورم ځای لري، چې وګړي یې ۱۹۱ هېوادونو ته بې له ویزې سفر کولای شي او امریکا بیا اووم مقام تر لاسه کړي او وګړي یې ۱۸۸ هېوادونو ته بې وېزې سفر کولای شي.
یوه لسیزه وړاندې، امریکا او انګلستان په دغه لیست کې لومړی مقام درلوده.
عربي متحده اماراتو بیا د دغه لېست پړاونونه په چټکۍ سره تېر کړي او یوولسم پړاو ته یې ځان رسولی، چې وګړي یې ۱۸۳ هېوادونو ته بې له وېزې سفر کولی شي.
چین بیا په ۶۲ مقام کې ځای لري او وګړي یې ۸۵ هېوادونو ته بې وېزې سفر کولی شي، د دغو هېوادونو شمېر د تېرې لسیزې په پرتله دوه چنده شوی دی.
افغانستان چې د دغه لېست کې وروستۍ مقام خپل کړی، وګړي یې یوازې ۲۸ هېوادونو ته بې ویزې سفر کولی شي. تر افغانستان مخکې سوریه، اعراق او یمن هېوادونو ځای اخیستې او وګړي یې د ۲۹ او ۳۵ هېوادونو ترمنځ بې ویېزې سفر کولای شي.
