په پاکستان کې د مېشتو افغان خبریالانو ستونزو ته د حل له پاره د لارو چارو د موندلو په موخه د بې پولې خبریالانو دفتر په اسلام اباد کې د دغو خبریالانو له استازو سره ناسته وکړه.
په دغې ناسته کې د افغان خبريالانو استازو په پاکستان کې د مېشتو افغان خبريالانو ستونزې په څلورو برخو ووېشلې او د موضوع په بېلابېلو اړخونو يې خبرې او نظرونو سره شریک کړل.
دغه راز د خبريالانو پر ټولنيزو ننګونو، د ملګرو ملتونو د عالي کمېشنرۍ د دفتر او يو شمېر نورو بنسټونو لهخوا د دوى د دوسيو پر وخت نه څېړل، د پاکستان د ويزو د تمديد او په بېلابېلو لارو له درېيمو هېوادونو څخه د ويزو ترلاسه کولو پر ستونزو خبرې وشوې او د هغوى پر پلانونو او وړانديزونو يې سره خبرې وکړې.
د دې غونډې په پای کې د پاکستان د ار اېس اېف څانګې مشر اقبال خټک د افغان خبریالانو د استازو لهخوا د وړاندې شویو پلانونو او د دغو ننګونو د حل لپاره خپل چمتووالی څرګند کړ او ویې ویل:« د ار اېس اېف څانګه چمتو ده، چې دغه موضوع وڅاري او پایلې به یې ژر تر ژره د افغان خبریالانو له استازو سره په راتلونکې جوړه شوې غونډه کې شریکې کړي او له اړوندو ادارو سره به په همغږۍ د افغان خبریالانو ستونزې هوارې کړي.»
په تېرو پنځو کلونو کې سینګاپور او جاپان د نړۍ تر ټولو پیاوړي پاسپورټونه درلودل، چې خپلو وګړو ته یې د نورو هېوادونو په پرتله د وېزې پرته ډېرو هېوادونو ته د لاسرسي اجازه ورکوله؛ خو سږ کال ډېر څه بدل شوي دي.
په ۲۰۲۴ کال کې د څلورو اروپایي هېوادونو د پاسپورټ اعتبار لا پسې لوړ شوې او د لیست په سر کې سینګارپور او جاپان سره یو ځای شوي، چې لومړی مقام یې خپل کړی.
د فرانسې، جرمني، ایټالیا او هسپانیې وکړي اوس له ۲۲۷ هېوادونو څخه ۱۹۴ هغو ته له وېزې پرته سفر کولی شي، د دغو هېوادونو شمېر تېر کال ۱۹۱ و.
سویلي کوریا، سوېډن او فنلینډ بیا دوم مقام خپل کړی او وګړي یې کولی شي، چې ۱۹۳ هېوادونو له وېزې پرته سفر ولري.
اتریش، ډنمارک، ایرلینډ او هالنډ بیا درېیم مقام خپل کړی او وګړي یې ۱۹۲ هېوادونو ته پرته له وېزې د سفر اجازه لري.
انګلستان د سږکال په لېست کې څلورم ځای لري، چې وګړي یې ۱۹۱ هېوادونو ته بې له ویزې سفر کولای شي او امریکا بیا اووم مقام تر لاسه کړي او وګړي یې ۱۸۸ هېوادونو ته بې وېزې سفر کولای شي.
یوه لسیزه وړاندې، امریکا او انګلستان په دغه لیست کې لومړی مقام درلوده.
عربي متحده اماراتو بیا د دغه لېست پړاونونه په چټکۍ سره تېر کړي او یوولسم پړاو ته یې ځان رسولی، چې وګړي یې ۱۸۳ هېوادونو ته بې له وېزې سفر کولی شي.
چین بیا په ۶۲ مقام کې ځای لري او وګړي یې ۸۵ هېوادونو ته بې وېزې سفر کولی شي، د دغو هېوادونو شمېر د تېرې لسیزې په پرتله دوه چنده شوی دی.
افغانستان چې د دغه لېست کې وروستۍ مقام خپل کړی، وګړي یې یوازې ۲۸ هېوادونو ته بې ویزې سفر کولی شي. تر افغانستان مخکې سوریه، اعراق او یمن هېوادونو ځای اخیستې او وګړي یې د ۲۹ او ۳۵ هېوادونو ترمنځ بې ویېزې سفر کولای شي.
