د روسیې د بهرنیو چارو وزیر په یوه خبري غونډه کې د افغانستان په شمال کې د احمد مسعود په مشرۍ د ملي مقاومت جبهې شتون منلی او ویلي یې دي، چې له دغې جبهې سره باید د اړیکو پول جوړ شي.
سرګي لاوروف حامد کرزي او عبدالله عبدالله ته هم اشاره وکړه او ویې ویل؛ دوی طالبانو ته توصیه کوي، چې نور سیاسي ځواکونه هم حاکم ساختار ته وبلي.
په ورته وخت کې ښاغلي لاوروف ټینګار وکړ، چې دا بهیر اسانه نه دی.
په دې خبري غونډه کې د روسیې د ډېپلوماتیکو خدمتونو مشر د پنجشنبې په ورځ (د مرغومې ۲۸مه) د قزاقستان له تروریستي لېست څخه د طالبانو د نوم اېستلو ته اشاره وکړه او ویې ویل، چې دا د طالبانو د ډېپلوماټیکې رسمیت پېژندنې په معنا نه ده.
د روسیې د بهرنیو چارو وزیر وویل: "موږ له طالبانو سره منظم تماسونه لرو او که دا ډله په رسمیت پېژندل غواړي، باید لومړی د یوه ټول شموله حکومت د جوړولو په ګډون خپل مسوولیتونه پوره کړي."
هغه وویل چې ازبکان، تاجکان او هزاره ګان چې اوس د طالبانو په جوړښت کې دي هم له سیاسي پلوه د طالبانو برخه دي.
ښاغلي لاوروف همداراز زیاته کړه: «سره له دې چې طالبان پر افغانستان کنټرول لري" خو لا هم ځینې کړکېچونه او اعتراضونه شته.»
دا په داسې حال کې ده، چې له دې وړاندې هم د امریکا په ګډون ګڼو سیمه ییزو هېوادونو پر طالبانو غږ کړی، چې په افغانستان کې دې یو ټولګډونه نظام رامنځته کړي؛ خو طالبانو بیا دا د دوی کورنۍ مساله ګڼلې ده.
