د پاکستان د بهرنیو چارو وزارت منشي وايي، داسې کره شواهد لري چې د دوو پاکستاني وګړو په وژلو کې د هندي ایجنټانو ښکېلتیا ښيي. سایرس سجاد قاضي نن په اسلام اباد کې خبریالانو ته وویل، چې په دې مرګونو کې ښکېل او له هندي استخباراتو سره تړاو لرونکی کس یې نیولی دی.
ښاغلی قاضي زیاتوي چې دغه نیول شوي کس د پنجاب په سیالکوټ کې د شاهد لطیف په نوم د یوه پاکستاني وګړي په وژلو کې خپل لاس لرل منلي دي.
د هغه په خبره، دا ایجنټان له هندي استخباراتو سره تړلي دي، ځايي اجرتي قاتلانو ته په پیسو ور کولو سره وژنې کوي او لطیف هم د ځايي قاتلانو په همکارۍ وژل شوی دی.
د پاکستان د بهرنیو چارو وزارت دغه چارواکی زیاتوي چې هندي جاسوسانو تېر کال د کشمیر په راولاکوټ کې هم د محمد ریاض په نوم یو بل پاکستانی وژلی و.
پاکستاني چارواکي دا وژنې په کاناډا او امریکا کې له هغو قتلونو سره ورته بولي چې پکې د هند استخباراتو ته ګوته نیول کېږی.
کاناډا او امریکا څو میاشتې مخکې پر هندي استخباراتو تور ولګاوه چې د دوی په خاوره کې یې وژنې کړې دي.
هند د اوتاوا تور رد کړی، خو د امریکا د ادعا په هکله یې پلټنې پیل کړې دي.
که څه هم نوي ډېلي د پآکستان د دې تور په هکله څه نه دي ویلي، خو سایرس سجاد قاضي وايي، هند د دوی د ځمکنۍ بشپړتیا خلاف ورزي کړې او باید ځواب ور کړي.
دوی دا هم وايي چې د پاکستاني وګړو په وژلو کې د هندي استخباراتو د ښکېلتیا ډېرې دوسیې ور سره شته، خو تر اوسه یې یوازې دا دوه مستندې کړې دي.
