د افغانستان د خبریالانو مرکز وايي، د جاپان د «کیودو» خبري اژانس خبریال احسان اکبري نن د طالبانو له بند خوشی شو. د طالبانو استخباراتو ۹ ورځې مخکې ښاغلی اکبري په کابل کې نیولی و.
د افغانستان د خبریالانو مرکز نن د نوموړي د خوشي کېدو په هکله په خپله اېکس پاڼه کې د احسان اکبري نیول کیدل بې قانونه بولی او وايي، باید ازادي یې سلب شوې نه وای.
د نوموړي د کورنۍ یوه غړي دغه مرکز ته ویلي، چې ښاغلی اکبري نن شاوخوا درې بجې خوشی شو.
یوې بلې سرچینې بیا ویلي، چې احسان اکبري په "ضمانت" خوشی شوی او د هغه د هویت ځینې اسناد د استخباراتو له خوا ضبط شوي دي.
د افغانستان د خبریالانو مرکز د ښاغلي اکبري د نیولو په غبرګون د طالبانو د استخباراتو له ریاسته غوښتي و چې د هېواد د رسنیو قانون ته درناوی وکړي او د خبریالانو او ازادو رسنیو د ځپلو لړۍ پای ته ورسوي.
احسان اکبري چې له شاوخوا يوه کال راهيسې په کابل کې د کيودو خبري اژانس په دفتر کې د خبريال په توګه دنده ترسره کوله د مرغومي په ۲۷مه په کابل د نامعلوم علت له امله ونیول شو.
دا په تیرو نږدې دوو ا ونیو کې دریم خبریال دی چې د طالبانو له خوا تر نیول کیدو وروسته بیرته خوشی کیږي.
د ګردش اطلاعات خبري ژانس دوه خبریالان جواد رسولي او عبدالحق حمیدي، چې د مرغومي په ۲۸ مه د طالبانو د استخباراتو له لورې په کابل کې نیول شوي وو،هغوی هم د ضمانت په ورکولو سره خوشي شول.
