د پاکستان ولسمشر په دغه هېواد کې د ۵۰ زره نورو ښوونځیو د جوړېدو غوښتنه وکړه
د پاکستان ولسمشر عارف علوي په دغه هېواد کې د بې ښوونځیو ماشومانو لپاره د ۵۰ زره نورو ښوونځیو د جوړولو غوښتنه وکړه.
د پاکستان ولسمشر عارف علوي په دغه هېواد کې د بې ښوونځیو ماشومانو لپاره د ۵۰ زره نورو ښوونځیو د جوړولو غوښتنه وکړه.
عارف علوي دا خبره د چهارشنبې په ورځ د اسلام اباد کې د علامه اقبال پرانیستي پوهنتون کې یوې غونډې ته په وینا کې وکړه
علوي وویل؛ زموږ شاوخوا ۴۵ سلنه ماشومان له ښوونځیو بې برخې دي، چې ۶۰ میلیونه کېږي.
هغه وويل، چې په هېواد کې ٢٥٠ زره جوماتونه شته، چې له ښوونځیو څخه د محرومو ماشومومانو د زکړې لپاره کارېدلی شي.
تېر کال په پاکستان کې له ښوونځي د بې برخې ماشومانو شمېر ۲۳ میلیونه ښودل شوی و؛ خو سږ کال دا شمېر درې میلیونه نور هم ډېر شوی دی.
د امریکا د خزانې وزارت یوه جګپوړي چارواکي ویلي، هېواد یې تمه لري چې د عراق حکومت له امریکا سره د ایران ملاتړو وسله والو ډلو د عملیاتو په اړه هر ډول معلومات شریک کړي.
نوموړي رویټرز او سي این این ته د نوم د نه ښودلو په شرط ویلي، چې د ایران په ملاتړ وسلوالې ډلې د خپلو بریدونو د تمویل لپاره د عراق له مالي سیستم څخه کار اخلي.
دغه چارواکي ويلي، چې دوی په حساسو شرایطو کې دي او له معلوماتو وروسته به د دې وسلوالو ډلو د مالي مسالو په باب پرېکړه کوي.
په دې وروستیو کې د امریکا د مرکزي استخباراتو ادارې سي ای اې مشر ویلیم برنز په "فارن افییرز" مجله کې په یوه یادښت کې لیکلي، چې په غزه کې روان کړکېچ او د اسراییل او حماس تر منځ جګړې ایران "ډېر زړور" کړی دی.
هغه د سیمې په هېوادونو باندې د ایران حملو او د امریکا په اډو باندې د ایران د نیابتي ډلو حملو ته په اشارې ټینګار وکړ، چې د اسراییل او سیمې د امنیت لپاره له ایران سره مناسب چلند کول پکار دي.
د تېرې یکشنبې په سهار وختي د سوریې، عراق او اردن په سرحد کې د امریکا اډه د بې پیلوټه الوتکې په برید کې په نښه شوه او په همدې ورځ امریکا اعلان وکړ، چې په برید کې ۳ امریکایي سرتېري وژل شوي او په لسګونه ټپیان شوي دي.
پنټګان د دوشنبې په ورځ اعلان وکړ، چې په اردن کې پر امریکايي اډې په برید کې د ایران له ملاتړه برخمنې د عراق د کتاب حزب الله ډلې نښې لیدل کېږي.
د پنټګان ویاندې سبرینا سېنګ په یوه خبري غونډه کې زیاته کړه: «موږ پوهیږو چې ایران د هغو ډلو ملاتړ کوي، چې پر امریکايي ځواکونو بریدونه کوي.»
د سپینې ماڼۍ د ملي امنیت شورا ویاند جان کربي هم ټینګار کړی: «موږ د تاوتریخوالي پلویان نه یو؛ خو د ځان او خپلو ځواکونو د ساتنې لپاره هر هغه څه ته چې اړتیا وي ترسره به یې کړو.»
د پاکستان د پوځ لوی درستیز له لوړ رتبه قوماندانو سره په ناسته کې ويلي، چې په پاکستان کې به هیچا ته د سیاست په نوم د تشدد اجازه ور نه کړي. د پاکستان د پوځ د عامه اړیکو دفتر وايي؛ په دغه غونډه کې د هند له خوا د پاکستاني وګړو د په نښه کولو او پر وړاندې پر اقداماتو هم بحث وشو.
د پوځ د نننۍ اعلامیې له مخې، هند له نړۍ،الو قوانینو په ښکاره ډول سرغړونه کوي او د هند اصلي “څېره” باید نړۍوالې ټولنې ته په ډاګه شي.
د پوځ مشر ویلي، چې د پاکستان ملي حاکمیت او ځمکنی تمامیت باید وساتل شي.
نوموړي ويلي، چې هند د پاکستان په ګډون د نړۍ په ګوډ – ګوډ کې له دولتي ځواک څخه په استفادې خلک په نښه کوي او وژنې کوي.
د پاکستان د پوځ د تازه څرګندونو په اړه تر اوسه د هند حکومت غبرګون نه دی ښودلی.
خو تېره اونۍ یې د اسلام اباد دا تورونه رد کړل چې په پاکستان کې یې د خپلو جاسوسانو په مټ دوه پاکستانیان وژلي دي.
عاصم منیر په دغه غونډه کې دا هم ویلي، چې په راتلونکو ټاکنو کې به هیچا ته د تشدد او د ټاکنو د سبوتاژ کولو حق ورنه کړي او دوی به یې په پوره ځواک مخه ونیسي.
په پاکستان کې د سیاستوال بیا اندېښنه ښيي، چې د پاکستان پوځ په ټاکنو کې مستقیمه لاسوهنه کوي.
د پاکستان د ټاکنو په بهیر کې د پاکستاني پوځ د مداخلې په اړه نه یوازې دا چې په ټيټه کچه اندېښنې موجودې دي؛ بلکې د پاکستان د پخواني لومړي وزیر عمران خان ګوند په تازه اعلامیه کې ویلي، چې د پاکستان حکومت او پوځ یې د ټاکنیزو کمپاینونو پر وړاندې خنډونه جوړوي.
تازه په کراچۍ، لاهور او کوټه کې پولیسو د تحریک انصاف ګوند غړي نیولي دي.
د پاکستان ټاکنې اته ورځې وروسته کېږي.
د پښتونخوا په باجوړ کې د قامي اسمبلۍ ټاکنو امیدروار ریحان زېب نن د وسلوالو په برید کې ووژل او درې ملګري یې ټپیان شول. رېحان زېب په غریبه کورنۍ کې زېږېدلي او د تحریک انصاف ګوند د ځوانانو څانګې سره په یو ځایېدو په مشهور او فعال ځوان مشهور شو.
ریحان زېب نن د باجوړ ټانک ته د خپلو ټاکنیزو منډو ترړو لپاره روان و چې وسلوالو برید پرې وکړ.
تر اوسه کومې ډلې پر نوموړي د برید مسوولیت نه دی منلی.
ځايي رسنۍ د پولیسو په حواله وايي، په برید کې ریحان او درې ملګري یې ټپیان شوي و، خو ریحان وروسته روغتون کې مړ شو.
په پېښور کې د افغانستان انټرنشنل- پښتو خبریال رفعت الله اورکزی وايي، ریحان زېب د پاکستان د تحریک انصاف ګوند د ځوانانو غړی و، ځو ټاکنو ته خپلواک ولاړ و او دې ګوند هم ټکټ نه و ور کړی.
د هغه په خبره، ریحان زېب کومه سیاسي یا شتمنه کورنۍ پورې تړلی نه ده، خو تېرو ۱۵ کلونو کې ټولنیز فعالیت سره په خپله وړتیا وښوده او ځان یې تر نوماندۍ ورساوه.
د پاکستان ټولټاکنې اته ورځې وروسته دي چې پکې د دغه هېواد پارلمان یا قامي اسمبلۍ او صوبايي پارلمان ته غړي ټاکل کېږي.
د پاکستان د بلوچستان د ترهګرۍ ضد اداره وايي، د دې صوبې په مچ کې یې په چاڼیزو عملیاتو کې یوولس وسلوال ووژل. دا اداره وايي، له وسلوالو یې ۷ یرغمل وګړي هم خوندي ژغورلي او هم یې وسلې او مهمات نیولي دي.
دې امنیتي ادارې نن خپل اېکس کې د امنیتي ځواکونو د وروستۍ مرګ ژوبلې په هکله څه نه دي ویلي، خو پرون د پاکستان پوځ ویلي و چې څلور امنیتي سرتېري او دوه ولسي وګړي وژل شوي دی.
پوځ په دغه برید کې د دریو ځانمرګو په ګډون د نهو وسلوالو د وژلو خبر هم ور کړی و.
د بلوڅ ازادۍ جبهې دا برید د دوشنبې په شپه په مچ او کولپور کې د پاکستان پر امنیتي ځواکونو په درنو چاودنو سره پیل او د سې شنبې تر سهار روان و.
که څه هم د پاکستان پوځ د دې برید د ژر ختمېدو او د وسلوالو د په شا تمبولو خبره کوي، خو له سیمې رپوټونه وايي چې لا هم هلته ژوند عادي نه دی.
د ځايي خلکو په خبره، ښار پرون هم بند و او نن هم هلته د ټرانسپورټ په ګډون نور کاروبار تړلی دی.
ځايي خک دا هم وايي چې د پوځ او وسلوالو په جګړه کې ښار او استوګنځي هم زیانمن شوي دی.
بلوڅ ازادۍ جبهې د برید پیلولو سره پر ښار د خپلې ولکې او پنځوسو امنیتي ځواکونو ته د مرګ ژوبلې اړولو ادعا هم وکړه.
مچ د بلوچستان د بولان درې یوه ناامنه سیمه ګڼل کېږي، چې پکې له نږدې شلو کلونو راهیسې د پاکستان پر امنیتي ځواکونو بریدونه کېږي.
د طالبانو کډوالو چارو وزارت ویلي له پاکستان او ایران څخه تر زرو زیات افغان کډوال افغانستان ته راستانه کړل شوي. د دغو کډوالو په ډله کې چې۳۲ بې سرپرسته ماشومان هم شامل وو چې د اسلام کلا، تورخم او سپین بولدک له لارو هیواد ته راستانه شوي دي.
د طالبانو کډوالو او راستنېدونکو چارو وزارت د چهار شنبې په ورځ د (سلواغي۱۱مه) په اېکس پاڼه لیکلي چې، له ایرانه ۱۱۵۹ تنه افغان کډوال په جبري ډول او خپله خوښه هیواد ته راستانه کړل شوي.
له ایرانه په تازه راستنو شویو کډوالو کې ۳۲ بې سرپرسته ماشومان هم شامل وو چې، د کډوالو وزارت د کارکوونکو له لوري (وارچایلډ) یا د جګړې ماشومانو ادارې ته سپارل شوي.
دغه وزارت ویلي، په دغو کډوالو کې کورنۍ هم شته چې د هرات د اسلام کلا له لارې راستنې شوې دي.
د کډوالو چارو وزارت وايي، د یادو کډوالو له ډلې ۴۴۸ تنه یې اړمن پيژندل شوي چې د خوراکي توکو تر څنګ ورسره نغدي مرستې هم شوې دي.
همدارنګه د کډوالو چارو وزارت وايي چې د سې شنبې په ورځ ۲۷۶ تنه افغان کډوال د ننګرهار د تورخم او د کندهار د سپین بولدک له لارو په جبري ډول هیواد ته راستانه شوي دي.
دغه وزارت ویلي چې، له پاکستانه په جبري ډول تازه راستانه کړل شوي افغان کډوال یې د ملګرو ملتونو د کډوالۍ عالي شورا ته د مرستو ترلاسه کولو په موخه ور پيژندلي دي.
د پاکستان د لنډمهالي حکومت له لوري د ۲۰۲۳ کال په سپتمبر میاشت کې له دغه هیواده د بې اسناده افغان کډوالو د ایستلو لړۍ پیل شوې چې، هره ورځ سلګونه افغان کډوال له دغه هېواده په جبري ډول افغانستان ته شړل کیږي.