د پاکستان پوځ وايی، په سوېلي سوډان کې د دغه هېواد د وژل شوي سرتېري جنازه نن د سیند صوبې په بدین کې خاورو ته وسپارل شوه. د ملګرو ملتونو د سوله ساتو ځواکونو په چوکاټ کې اونۍ مخکې پر پاکستاني ځواکونو برید وشو چې پکې محمد طارق ووژل او څلور نور ټپیان شول.
پر دوی هغه مهال د سوډان او سوېلي سوډان پوله کې برید وشو چې دوه ناروغان یې روغتون ته لېږدول.
د پاکستان د پوځ د عامه اړیکو اداره وايي، چې د دغه هېواد ۱۸۱ سرتېرو د نړیوالې سولې لپاره خپل ځان قربان کړی دی.
دغه اداره زیاتوي چې د ملګرو ملتونو په چوکاټ کې خپلې همکارۍ ته ژمن دي او د سولې او ټیکاو په برخه کې به خپلې هڅې کوي.
د پاکستاني رسنیو د مالوماتو له مخې دغه هېواد د ملګرو ملتونو د سوله ساتو ځواکونو د ډېر شمېر له پلوه پنځمه درجه لري.
د پاکستان ۴۲۰۰ پوځیان او پولیس په ایبي، سوډان، د مرکزي افریقا جمهوریت، قبرس، کانګو ډیموکراټیک جمهوریت، مالي، سوېلي سوډان او لوېدیځه صحرا کې د سولې لپاره فعالیت کوي.
