د پاکستان پخواني لومړي وزیر په ټاکنو کې د خپلو پلویانو د بریالیتوب مبارکي ورکړې
سره له دې چې لا تر اوسه په پاکستان کې د شویو ټاکنو وروستۍ پایلې نه دي اعلان شوې؛ خو د دغه هېواد پخواني لومړي وزیر له زندانه د خپل ګوند د پلویانو د بري اعلان کړی دی.
سره له دې چې لا تر اوسه په پاکستان کې د شویو ټاکنو وروستۍ پایلې نه دي اعلان شوې؛ خو د دغه هېواد پخواني لومړي وزیر له زندانه د خپل ګوند د پلویانو د بري اعلان کړی دی.
په هغه ویدیویي پیغام کې چې نوموړي له زندانه خپور کړی، عمران خان خپلو پلویانو ته مبارکي ورکړې او ویلي یې دي چې ټول دې په ګډه د دغه ستر بري خوشالۍ ولمانځي.
په دغه پیغام کې عمران خان ویلي:« زه تاسو ټولو ته د ۲۰۲۴ کال په ټاکنو کې د بریالیتوب مبارکي درکوم. زما پر تاسو ټولو بشپړ باور و، چې تاسې به ټول د رای ورکولو مرکزونو ته ورځئ. تاسو زما باور پر ځای کړ او ستاسو برخې اخیستنې ټول حیران کړي دي. ستاسو د رایو له امله د لندن پلان ناکام شوی دی. زما هېوادوالو تاسو تاریخ بدل کړ، تاسو زما ویاړ یاست.»
ښاغلي عمران خان ویلي، چې د دوی لاره حقه ده او د پاکستان ولس یې هم پراخ ملاتړ کوي.
تر دې وړاندې د مسلم لیګ ګوند مشر نواز شریف هم خپلو پلویانو سره غږېدلی او دغه ټاکنې یې د پاکستان د ژغورلو له پاره اړینې بللې دي.
نوموړي سره له دې چې له نورو ګوندونو غوښتي، چې په شریکه دې ورسره حکومت جوړ کړي؛ خو بیا یې هم په باکستان کې د روغتیا، تعلیم او د خلکو په اقتصادی وضیعت کې د بدلون راوستو خبرې کړې دي.
هغه ویلي، چې په پاکستان کې به د تېلو او برېښنا په لګښتونو کې کمی راولي او د خلکو ورځني ژوند او د اقتصادي وضعیت ښه کولو ته به ډېره پاملرنه کوي.
سره له دې چې د پاکستان نورو ګوندونو لا تر اوسه داسې غونډې نه دي جوړې کړې؛ خو د یو شمېر راپورونو له مخې د پاکستان د پیپلز یا د خلکو د ګوند مشر بلاول بوټو زرداري دا مهال لاهور ته رسېدلی او ښايي د مسلم لیګ ګوند له مشرانو سره د جوړ جاړي پر سر خبرې وکړي.
