د طالبانو د بهرنیو چارو وزارت ویاند په مسکو کې د افغان سفارت لپاره د دې ډلې د نوې پوځي اتشې د ټاکلو خبر ور کړ. عبدالقهار بلخي دغه مقام ته د احمد یاسر د ټاکل کېدو د خبر په خپرولو د روسیې په ګډون «له ټولې نړۍ سره» د طالبانو د ښو او مثبتو اړیکو پر پراختیا ټینګار کړی دی.
د طالبانو غړو په اېکس شبکه کې لیکلي، چې احمد یاسر د دې ډلې د یوه پخواني چارواکي "استاد یاسر" زوی دی، چې یو وخت د طالبانو د کولتوري کمېټې مشر و.
طالبانو داسې عکسونه هم خپاره کړي چې اخمد ياسر په پوځي يونيفورم کې په دولتي دفتر کې ښکاري.
روسیې د ۲۰۲۲ کال د اپرېل په لسمه په مسکو کې افغان سفارت د طالبانو ډیپلوماټ ته وسپاره، خو لا یې هم د دې ډلې سفیر نه دی منلی.
طالبانو په یو مکتوب کې چې زموږ لاس ته هم رسېدلی، لیکلي يو شمېر نا دولتي ادارو د دوی سپارښتنې له پامه غورځولې او خپل تدارکاتي بهیر «په خپلسرې» توګه پر مخ بیایي.
په دغه مکتبوب کې ټینګار شوی، چې کورنۍ او بهرنۍ نادولتي ادارې «اړې» دي چې د خپلو تدارکاتي پړاوونو پر مهال د اقتصاد وزارت استازو ته هم د څارونکي په توګه بلنه ورکړي.
دغه سند د کب په ۲۱مه صادر شوی او د اقتصاد وزارت مالي او اداري مرستیال لاسلیک کړی هم دی.
د طالبانو حکومت تورن دی چې د نادولتي ادارو په چارو کې لاسوهنه کوي او په دې کار سره د مرسته رسونکو ادارو چارې هم ټکنۍ شوې دي.
د لېندۍ په میاشت کې د ملګرو ملتونو د بشري مرستو د همغږۍ د دفتر مشر رامش راجاسنګام ویلي و، چې طالبانو د مرسته رسوونکو ادارو په چارو کې لاسوهنه ډېره کړې ده. دغه لاسوهنې تر ډېره د کارکوونکو د ګومارنې او د طالبانو په ګټه د مرستو د وېش په برخو کې کېږي.
وال سټریټ ژورنال تېر کال د وري په میاشت کې راپور ورکړی و، چې طالبانو د مرستو د وېش او د موسساتو د کارکوونکو په ګومارلو کې لاسوهنه کړې وه او له ادارو یې غوښتي و چې خپلې پروژې د هغوی په خوښه وکاروي.
په نادولتي ادارو کې د طالبانو د لاسوهنې بله بڼه په دغو ادارو کې د ښځو په کار کولو د بندیزونو لګول دي، چې په ډېرو برخو کې د دغو ادارو د تړلو لامل هم شوي.