د طالبانو د کورنیو چارو وزارت ویاند وایي، د ۱۴۰۲ کال وروستیو ۶ میاشتو کې په افغانستان کې دې ډلې ۸ زره او ۷۴۸ جرمي پېښې ثبت کړې دي. عبدالمتین قانع زیاتوي، په دغه موده کې امنیتي ادارو ۱۲ زره ۵۴۰ کسان د جرمونو په تور نیولي چې د کال د لومړیو میاشتو پرتله نږدې شپږ ځلې زیاتوالی ښيي.
طالبانو د تېر کال عقرب کې ویلي و چې د کال په لومړیو شپږ میاشتو کې یې دوه زره ۱۳۶ کسان د جنايي جرمونو په تور نیولي دي.
نوموړي نن په کابل کې خبری غونډې ته وویل، چې د ۱۴۰۲ کال وروستیو شپږو میاشتو کې ۲۱ انسان تښوونکي وژل شوي، ۱۷۲ نیول شوي او اتلس تښتول شوي کسان د سړي تښتوونکو له منګلو خوشې شوې دي.
تر نورو کلونو تېر کال د اختطاف کچه کمه شوې ده.
ښاغلی قانع د ۸۷۴۸ جرمې پېښو په هکله وایي، چې په دې کې ۷ زره او ۲۲۳ یې کشف شوې او یو زرو ۵۲۵ نورې یې تر تعقیب لاندې دي.
د طالبانو د کورنیو چارو وزارت ویاند عبدالمتین قانع دغه راز زیاته کړې، چې د نشه یي توکو پر ضد مبارزه کې د نشه یي توکو د تولید ۸ ماشینونه، د تولید او پروسس ۳۷۷ بیلابیلې فابریکې کشف او له منځه وړل شوې دي.
د نوموړي په وینا، په دغه موده کې ۳.۶۴۵ زره هکتاره ځمکه د کوکنارو له کر پاکه شوې ده.
عبدالمتین قانع د جرمي پېښو د راپور د وړاندې کولو په خبري غونډه کې وویل، چې په تېرو شپږو میاشتو کې ۱۳۲۲ میله وسلې، د سپکو او درنو وسلو ۴۲ زره فیرونه، ۲۵۱ لاسي بمونه، ۱۸۴ ماینونه او ۳۲۴ کیلوګرامه چاودیدونکي توکي هم ترلاسه شوي دي.
که څه هم د طالبانو امنیتي ادارو په ځلونو واک ته د دغې ډلې له رسېدو وروسته د امنیت د ټينګښت ډاډ ورکړی، خو یو شمېر هېوادوال بیا له وسله والو غلاوو، برمته کولو، خپلسریو او نورو پيښو سر ټکوي.
