د کندهار په ارغنداب ولسوالۍ کې د طالبانو لومړنۍ محکمې پنځه هغه کسان چې د دغې محکمې له لوري د اخلاقي فساد په تور پېژندل شوي و تېره ورځ چهار شنبه د (وري اتمه) په عام محضر کې په دورو وهلي. تر دې وړاندې هم طالبانو د افغانستان په نورو ولایتونو کې ځینې کسان په سزا رسولي وو.
د کندهار لپاره د طالبانو امنیه قوماندانۍ په یوه خپره شوې خپرپاڼه کې ويلي، چې دغه کسان یې چې د دغه ولايت په ارغنداب ولسوالۍ کې د «لواطت» په تور نیولي وو، تېره ورځ یې هر یو ۳۹ دورې وهلي او دوه دوه کاله د بند سزا یې ورته اورلې ده.
طالبانو دغو تورنو کسانو ته په ارغنداب ولسوالۍ کې په عام محضر کې سزا ورکړې ده.
دا لا نه ده معلومه چې د دغو پنځو کسانو په ډله کې ټول نارینه وو او که د دوی تر منځ ښځې هم وې.
تېره اوونۍ د طالبانو مشر هبت الله ته په منسوب یوه غږیز فایل کې ويل شوي و چې په اخلاقي فساد تورن کسان په ځانګړي ډول ښځې به د دغې ډلې له لوري په عام محضر کې په دورو وهل او یا سنګساریږي.
سره له دې چې په عام محضر کې د سزا د حکم تطبیق له بشري حقونو سرغړونه بلل کیږي، خو طالبان وایي چې دوی په تورنو کسانو شرعي حکم تطبیقوي.
د طالبانو له بیا واکمنۍ وروسته د افغانستان په بیلابیلو ولایتونو کې پر ښځو او نارینه وو چې کره شمیر یې نه دی معلوم، په ځلونو په عام محضر کې د قصاص او دورو وهلو حکم عملي شوی.
