د فرانسې د کورنیو چارو وزارت اعلان وکړ، چې د ایسټر د امنیت د ټینګښت لپاره یې د شاوخوا څلور زره او ۵۳۰ کلیساګانو لپاره دیارلس زره او ۵۰۰ پولیس ګومارلي دي. د دې هېواد د کورنیو چارو وزیر وایي، چې دا تابیاوې له هر ډول «ترهګریزو» کړنو څخه د کلیساګانو د ساتنې په موخه شوي دي.
په مسکو کې د داعش ډلې له برید وروسته فرانسې په دغه هېواد کې د ترهګرۍ خبرداری تر ټولو لوړې کچې ته ورساوه.
د دغه هیواد د کورنیو چارو وزیر جرالډ داروین د امنیتي تابیاوو په دوام، دا ځل د کاتولیکانو او پروټیسټینټ د عبادت ځایونو د ساتنې لپاره د امنیتي کارکوونکو د زیاتولو اعلان وکړ.
د راپورونو له مخې، په ټوله فرانسه کې به د جمعې له ورځې تر دوشنبې پورې د دغه هېواد په بېلابېلو برخو کې امنیتي ځواکونه مېشت وي.
ټاکل شوې، چې کاتولیکان او پروټیسټینټ به د یکشنبې په ورځ د عیسی مسیح د یاد مراسم ترسره کړي، په داسې حال کې چې ارتودوکس عیسویان به د مې تر ۶ پورې خپلو مراسمو ته په تمه وي.
په دې وروستیو کې د فرانسې ولسمشر ایمانویل مکرون اعلان وکړ، هغې ډلې چې په روسیه کې د کنسرت پر تالار د خونړي برید پلان جوړ کړی و، په تېرو میاشتو کې یې په فرانسه کې هم د عملیاتو هڅه کړې وه.
