د طالبانو عدليې وزارت اعلان وکړه، چې دوی په تېر ۱۴۰۲ کال کې دوه سياسي ګوندونه او ۷۵ ټولنې او خيريه بنستونه د «غيرې قانوني» فعاليتونو له امله امنيتي ادارو ته ور پېژندلي دي. طالبانو په افغانستان کې د سياسي ګوندونو پر فعاليت بنديز لګولی دی.
د طالبانو د عدليې وزارت د یکشنبې په ورځ د (وري ۱۹مه) په يوې خبرپاڼه کې ويلي، چې په تېر ۱۴۰۲ کال کې يې د سلګونو مدني ټولنو او خيريه بسنټونو د فعاليتونو څارنه کړې ده.
دغه وزارت لیکلي، چې له دې ډلې یو شمېر سیاسي ګوندونه او لسګونه ټولنیز بنسټونه امنیتي ادارو ته معرفي کړي دي.
د طالبانو عدليې وزارت په خبرپاڼه کې د دغو ګوندونو او ټولنو نومونه نه دي ياد شوي.
د خبرپانې د معلوماتو له مخې؛ دوی په تېر يوه کال کې د ۳۶ نورو خیريه ټولنو فعالیتونه څېړلي، چې له جملې څخه يې له ۱۷ بنسټونو څخه د اصولو سره سم د فعالیت کولو ژمنې اخيستي او د ۱۹ بنسټونو فعالیت د جوازونو د نه نوي کولو امله لغوه کړي دي.
څو ورځې وړاندي د طالبانو د عدليې وزارت ویاند قاري برکت الله رسولي په يوه ويډيوي پيغام کې افغانانو ته خبرداری ورکړ، چې که چا سياسي فعالیت وکړ له سخت قانوني چلند سره به مخ شي.
هغه ويلي وو، چې اوس مهال يوازي خيريه بنسټونه فعالیت کولای شي.
درې ورځي وړاندي د طالبانو سترې محکمې خبر ورکړ، چې په کندهار کې يې په لومړي ځل دوه کسان د سیاسي فعالیت په تور په ۱۵ - ۱۵ کاله بند محکوم کړل او یو بل کس یې د سیاسي فعالیت له امله ۳۰ دورې وواهه.
