په ارزګان کې د طبعي پېښو پر وړاندې د مبارزې اداره وایي، چې په دې ولایت کې وروستيو اورښتونو ۱۲ کسان مړه کړي او ۶ نور يې ټپیان کړي دي. د طالب ولایتي مسوولانو په خبره؛ د خلکو د ژغورلو هڅې روانې دي.
په ارزګان کې د طبعي پېښو سره د مبارزې ادارې د دوشنبې په ورځ د (وري ۲۷مه) د رسنيو سره د وروستيو سېلابونو د مرګ ژوبلې لومړني معلومات شریک کړي.
ولایتي طالب مسولانو ويلي، چې سېلابونو د ځاني مرګ ژوبلې اړولو ترڅنګ په لسګونه کورونه او کرنيزه ځمکه هم ویجاړه کړې ده.
د ارزګان د طالبانو د والي وياند بلال ارزګاني پر خپله اېکس پاڼه د سېلابونو تصويرونه خپاره کړي او ورسره یې ليکلي دي، چې د ملکي خلکو د ژغورنې هڅې جريان لري.
د هغه په خبره؛ ډېرو زيانمنو کورنيو ته يې لومړنۍ مرستې رسولې دي.
طالبانو نن دوشنبه سهار ويلي وو، چې په فراه ولایت کې هم د وروستیو اورښتونو او سېلابونو له امله د دوو ماشومانو په ګډون څلور کسان مړه شوي او یو بل ټپي شوی دی.
د طالبانو تر واک لاندې ملي ټلویزیون راپور ورکړی، چې په کندهار ولایت کې هم د سختو اورښتونو او سېلابونو له امله ۱۴۶ کورونه وېجاړ شوي او شاوخوا ۲۴۳ څاروي له منځه تللي دي.
دا په داسې حال کې ده، چې په تېرو درېيو ورځو کې د هېواد په بېلابېلو ولایتونو کې د وروستیو اورښتونو او سېلابونو له امله ۶۰ کسانو ته مرګ ژوبله اوښتې او سلګونه کورونه ویجاړ شوي دي.
پېښو ته د رسېدو په چارو کې د طالبانو د وزارت ویاند وايي ویلي دي، چې د ښځو او ماشومانو په ګډون ۳۳ کسانو ژوند له لاسه ورکړی او ۲۷ نور ټپيان دي.
