د طالبانو د ګمرکونو مشر د کندهار، نيمروز او فراه ولایتونو د ګمرکونو له مسوولينو سره په ليدنه کې له هغوی غوښتي، چې په خپلو چارو کې «همږغي او سلسله مراتب» مراعت کړي. عبدالمتين سعيد د يوه پلاوي په مشرۍ په کندهار کې دغه ليدنه تر سره کړې.
د طالبانو ماليې وزارت د دوشنبې په ورځ (د وري ۲۷مه) پر اېکس پاڼه ليکلي، چې د دوی د ګمرکونو مشر ولايتي مسوولينو ته سپارښتنه کړې؛ څو سوداګريز توکې په سم ډول تشریح او لابراتوار ته جدي پاملرنه وکړي.
د طالبانو د ګمرکونو مشر عبدالمتين سعيد له ولایتي ریسانو غوښتنه کړې، چې تر ټاکلي وخت زیات کار وکړی او سوداګريز توکي په سم ډول وڅاري.
ډېر سوداګر په ګمرکونو کې د لوړې ماليې، د مامورينو د پر وخت کارونو نه تر سره کول او د لابراتوارونو د نشتوالي څخه شکايت کوي.
د دې سره ترڅنګ یو شمېر افغان سوداګر په افغانستان کې د فساد کچه لوړه یادوي؛ خو د ماليې وزارت چارواکو په خپلو څرګندونو کې ويلي، چې د هېواد ټولې چارې له داخلي بوديجې څخه مخ ته وړي او نړۍ ورته حېرانه ده.
