د امریکا د کنیکټیکټ ایالت په ییل پوهنتون کې د دوشنبې په ورځ د فلسطین پلوه لاریون په ترڅ کې لسګونه لاریونوال د پولیسو له خوا ونیول شول، په داسې حال کې چې د نیویارک ښار په کولمبیا پوهنتون کې د تاوتریخوالي د کمولو په موخه حضوري صنفونه لغوه شوي دي.
په کولمبیا پوهنتون کې تېره اونۍ پولیسو د فلسطین پلوه لاریون کوونکو پر وړاندې د پوهنتون له شکایت وروسته د هغوی خیمې غوڼډې کړې وې او یو شمیر لاریون کوونکي یې نیولي وو.
په ټولنیزو رسنیو کې خپاره شوي تصویرونه ښيي، چې لاریون کوونکو د ییل پوهنتون شاوخوا سیمې د ترافیک په مخ تړلې وې او د پوځي وسلو د تولید کونکو څخه د دغه پوهنتون د جلا کېدو غوښتنه یې کوله.
لسګونه لاریون کووونکوي د پولیسو له خوا نیول شوي دي.
د ییل ډیلي نیوز ورځپاڼې په وینا، چې د زده کونکو له خوا چلول کیږي، پولیسو له ۴۰ څخه ډېر کسان نیولي.
د ییل پوهنتون چارواکو په دې اړه له تبصرې ډډه کړې ده.
د ییل، کولمبیا او نورو پوهنتونونو په ګډون د امریکا په بېلابېلو ښارونو کې د اسراییل له خوا پر فلسطین د بریدونو په غبرګون لاریونونو یو ځل بیا زور اخیستی دی.
د تېر کال د اکټوبر میاشتې په اوومه نېټه پر اسراییل د حماس له خونړي برید وروسته، اسراییل په غزې پراخ ځمکني او هوايي بریدونه پیل کړي، چې نږدې ټوله غزه یې ویجاړه کړې ده.
بشري حقونو مدافعینو په وینا؛ د اکټوبر له اوومې راهیسې د یهودانو، عربو او مسلمانانو پر وړاندې د تعصب او کرکې کې عمومي زیاتوالي راغلی دی.
د کولمبیا پوهنتون مشر نعمت مینوچ شفیک د دوشنبې په ورځ په یوې اعلامیه کې وویل، چې دغه پوهنتون حضوري صنفونه لغوه کړي دي او د شاګردانو ترمنځ یې د کرکې او اختلافونو خپریدل غندلي دي.
د کولمبیا پوهنتون د نیویارک په څانګه کې د حضوري ټولګیو د لغوه کولو پرېکړه د ۱۰۰ څخه زیاتو لاریون کونکو له نیول کیدو وروسته وشوه.
پوهنتون له دغو لاریون کوونکو پولیسو ته شکایت کړی و چې ورځنۍ چارې یې ورګډوډې کړې دي.
