د طالبانو د سوداګرۍ او صنعت وزارت وايي، چې د افغان او ترکمن خصوصي شرکتونو ترمنځ لس تړونونه او هوکړه لیکونه لاسلیک شوي دي. دغه وزارت په اېکس پاڼه لیکلي، چې دغه تړونونه په هرات کې د دواړه هېوادونو د سوداګرو تر منځ لاسلیک شوي دي.
دغه وزارت ویلي، یاد هوکړه لیکونه د ودانیزو توکو، سیخ و ګول، ودانیزو رنګونو، د مرمرو ډبرې او د خوراکي توکو په برخو کې لاسلیک شوي دي.
تر دې وړاندې د طالبانو د سوداګرۍ وزیر نورالدین عزیزي د ترکمنستان د سوداګرو ټولنې له مشر اتاقلي اوف سره په لیدنه کې له نوموړي غوښتي و، چې خپل سوداګر دې په افغانستان کې پانګونې ته وهڅوي.
دغه وزارت (د غويي په ۱۰مه) ویلي و، د ترکمنستان، قزاقستان او طالبانو تر منځ د تورغونډۍ په بندر کې درې اړخیزه هوکړه شوې چې له مخې به یې یو ګډ لوژیستیکي ستر مرکز هم جوړ شي.
طالبان د خپلې واکمنۍ وروسته له تاجکستان پرته د منځنۍ اسیا له نورو هېوادونو سره توده راشه درشه لري؛ خو تر اوسه یو هېواد هم دغه ډله په رسمیت نه ده پېژندلې.
