په اسټرالیا کې د نیول شوي امریکايي پېلوټ وکیل وايي، چې هغه له چینايي هکر سره کار کاوه
د امریکا د سمندري ځواکونو یو پېلوټ چې د چنایي پوځي پېلوټانو په روزولو تورن شوی، له اسټرالیا څخه د وېستل کېدو له ګواښ سره مبارزه کوي.
د امریکا د سمندري ځواکونو یو پېلوټ چې د چنایي پوځي پېلوټانو په روزولو تورن شوی، له اسټرالیا څخه د وېستل کېدو له ګواښ سره مبارزه کوي.
د هغه وکیل وايي، چې نوموړي بې له دې چې پوه شي له یو چینايي هکر سره کار کړی و.
دغه پېلوټ چینايي پوځي پېلوټانو ته پر الوتکې وړونکو بېړیو د الوتکې د کېنولو زده کړې ورکړې وې.
۵۵ کلن ډینیل دوګن چې د اسټرالیا تابعیت لري، ویره لري چې د حساسو معلوماتو لپاره د لویدیځو استخباراتي ادارو غوښتنې د هغه کورنی ژوند له خطر سره مخامخ کوي.
دوګن هغه تورونه ردوي، چې ګواکې د امریکا د وسلو د کنټرول قوانین یې مات کړي دي.
هغه د ۲۰۲۲ کال راهیسې په اسټرالیا کې په زندان کې دی. نوموړی په بېجینګ کې له شپږو کلونو کار کولو وروسته د بېرته راستنېدو پر مهال په اسټرالیا کې نیول شوی و.
د متحده ایالاتو چارواکو د سو بن په نوم چینايي هکر څخه په لاسته راغلي کمپیوټر کې د دوګن سره د دغه هکر د خبرو په اړه اسناد موندلي دي.
د اسټرالیا لوی څارنوال مارک ډریفوس به د دوګن د قضیې له اورېدو وروسته پرېکړه وکړي، چې هغه متحده ایالاتو ته تسلیم کړي او که نه.
