د ایران سپاه پاسدارن ته نږدې خبري اژانس تسنیم نن په یو راپور کې د دغه هېواد د پولیسو له قوله ویلي، چې د پلازمینې تهران په لویدیځ کې یې د "شیطان پرستۍ" پر غونډه د چاپې پر مهال د دریو اروپایي اتباعو په ګډون تر ۲۶۰ ډیر کسان نیولي دي.
دا برید په ټول ایران کې د هغو ښځو په وړاندې له هڅو وروسته کیږي چې د ایران اسلامي جمهوریت د جامو اوصولو په نه مراعاتولو تورنې دي.
تسنیم لیکلي: «په تهران کې د شیطاني شبکې ماتول، د دریو اروپایي اتباعو نیول»
ویل کیږي چې په نیول شوو کسانو کې ۱۴۶ نارینه او ۱۱۵ ښځې شاملې دي.
پولیسو ویلي، چې د چاپې پر مهال یې الکول او نشه يي توکي هم نیولي دي.
دغه خبري اژانس له خپل راپور سره عکسونه هم خپاره کړي چې ویرونکي ماسکونه پکې لیدل کیږي.
