د طالبانو سترې محکمې ویلي، چې په بدخشان کې یې دوه تنه د "زنا" په تور په عام محضر کې په دورو وهلي. دغې محکمې نن یکشنبه (د غوايي ۳۰مه) په یوه خپره شوې خبرپاڼه کې ليکلي، چې دغه کسان یې په ٣٩ ۳۹ دورو وهلي.
طالبان وايي، دغو تورنو ته یې د یو کال او شپږ میاشتې سزاګانې هم اورولې دي.
طالبانو ویلي، چې د تورنو کسانو جسمي سزاګانې د بدخشان د لومړۍ محکمې له تصویب وروسته پلې شوې.
د طالبانو ډله هره اوونۍ په عام محضر کې یو شمېر افغانان په بېلابېلو تورونو په سزا رسوي.
د بشري حقونو مدافعانو او نړېوالې ټولنې په ځلونو د طالبانو له مشرانو غوښتي چې د تورنو کسانو د فزیکي او عامه سزاګانو مخه دې ونیسي؛ خو دغه ډله ادعا کوي چې د «اسلامي قانون» له مخې وګړو ته سزا ورکوي.
طالبان یوازې عامو وګړو ته جسمي سزاګانې ورکوي، څو میاشتې وړاندې د کابل لپاره د طالبانو د برېښنا شرکت د رییس یوه ویډیو خپره شوه، چې په کې نوموړی له خپل ساتونکي سره یو ځای څملي؛ خو نوموړي ته په عام محضر کې جسمي سزا ور نه کړل شوه او نه یې هم د جرم په اړه طالبانو کومه پرېکړه وکړه.
