مهرخبري اژانس چې د ایران د تبلیغاتي سازمان اړوند رسنۍ ده د ختیځ اذرربایجان په ولایت کې د چورلکې د غورځېدو په پېښه کې د ابراهیم رییسي د مرګ خبر تایید کړ. مهر خبري اژانس لیکلي: «د ترلاسه شوو معلوماتو پر بنسټ زمونږ د هیواد ولسمشر د خپل پلاوي په ملتیا د شهادت لوړ مقام ترلاسه کړ.»
د ایران د تبلیغاتي سازمان اړوند مهر خبري اژانس د دوشنبې په ورځ د (غوايي ۳۱مه) په ختیځ اذربیجان ولایت کې د دغه هېواد د ولسمشر د چورلکې غورځېدو په پېښه کې د ابراهیم رییسي د مرګ خبر منلی.
همدارنګه مهر خبري اژانس لیکلي چې په یاده چورلکه کې له ابراهیم رییسي سره د مل پلاوي نور کسان هم مړه دي.
همدارنګه د ایران د ولسمشر ابراهیم رییسي اجراييه مرستیال محسن منصوري او یو شمیر نورو ایراني چارواکو هم پر خپلو اېکس پاڼو د ابراهیم رییسي مړینه تایید کړې ده.
د ایران ولسمشر غورځېدلې چورلکه تر ۱۶ ساعته عملیاتو وروسته پیدا شوه.
د ایران د سرې میاشتې تر څنګ ترکيې او روسيې هم د ایران د ولسمشر د غورځېدلې چورلکې د لټون په عملیاتو کې برخه لرله.
د یو شمېر رسنیو د معلوماتو له مخې خرابه هوا د چورلکې د غورځېدو لامل بلل شوی دی.
