د امریکا د ولسمشر مرستیالې کمیالا هاریس له اوکراین سره د امریکا د دوامداره ملاتړ ژمنه وکړه او د دغه هیواد د انرژۍ سکتور او د بشري وضعیت د ښه کیدو لپاره یې د ۱.۵ میلیارد ډالرو مرستې اعلان وکړ.
هاریس دا اعلان د سویس په لوسرن ښار کې د اوکراین د سولې په سرمشریزه کې وکړ، چیرې چې هغې د اوکراین له ولسمشر ولادیمیر زیلینسکي سره کتلي هم دي. تمه کیږي چې هغه د سرمشریزې عمومي غونډې ته وینا هم وکړي.
هاریس له زیلینسکي سره د لیدو پر مهال وویل: "دا جګړه د روسیې د ولسمشر ولادیمیر پوتین لپاره یوه بشپړه ناکامي ده." هغې زیاته کړه: "دا زموږ په ګټه ده چې نړیوال نورمونه وساتل شي، او د همدې له امله د اوکراین ملاتړ کوو.”
د ولسمشر د مرستیالې دفتر وویل، چې په دې یونیم ملیارده ډالرو کې ۵۰۰ میلیونه ډالر د انرژۍ سکتور د بیارغونې لپاره په نظر کې نیول شوي. د امریکا له پخوانیو مرستو به هم ۳۲۴ میلیونه ډالر د انرژۍ زیربیناوو د جوړولو لپاره ولګول شي.
د هاریس دفتر وویل: "دا هڅې به له اوکراین سره مرسته وکړي چې د انرژۍ زیربناوې چې د روسیې وروستي بریدونو کې ویجاړې شوي، جوړې کړي او د دغه هیواد د انرژۍ سیسټم د ترمیم او پراخولو زمینه برابره کړي."
هغې همداراز د بهرنیو چارو وزارت او د متحده ایالاتو د نړیوالې پراختیا ادارې له خوا د ۳۷۹ میلیون ډالرو بشري مرستې اعلان کړې چې د اوکرایني کډوالو او جنګ ځپلو لپاره به ولګول شي.
دغه پیسې به د میلیونونو اوکراینیانو لپاره د خواړو، روغتیایی خدمتونو، سرپناه او اوبو برابرولو لپاره ولګول شي.
هاریس، په دغه غوڼډه کې د ولسمشر بایډن به استازیتوب ګډون کړی. ولسمشر بایډڼ چې اوسمهال د اوو صنعتونو هیوادونو په غوڼډه کې په ایټالیا کې دی، ټاکل شوې چې نن بیرته د امریکا لاس انجلس ښار ته راستون شي، چیرې چې نوموړی د خپل ټاکنیز کمپاین لپاره د پیسو د راټولو په یو پروګرام کې ګډون کوي.
