په قرغزستان کې ۱۵ تنه د داعش د ملاتړ په تور ونیول شول
د قرغزستان چارواکو پرون وویل، چې ۱۵ تنه یې د داعش د ملاتړ په تور نیولي دي. د قرغزستان د ملي امنیت ادارې ویلي: د دغې ډلې یو مشر په افغانستان کې د داعش د خراسان څانګې تر څارنې لاندې کار کاوه.
د قرغزستان چارواکو پرون وویل، چې ۱۵ تنه یې د داعش د ملاتړ په تور نیولي دي. د قرغزستان د ملي امنیت ادارې ویلي: د دغې ډلې یو مشر په افغانستان کې د داعش د خراسان څانګې تر څارنې لاندې کار کاوه.
د قرغزستان ملي امنیت ویلي چې دغه سخت دریځه ډله چې په پټه یې د داعش ایډیالوژۍ ته وده ورکوله، وپیژندل شوه او ونیول شوه او د هغوی فعالیتونه بند شول.
د مسکو په څنډه کې د کنسرت پر یوه تالار له مرګوني برید وروسته چې مسوولیت یې داعش پر غاړه واخېست، د دغې ډلې د ورانکارو فعالیتونو په اړه د منځنۍ اسیا د هېوادونو اندېښنې زیاتې شوې دي.
په افغانستان کې د داعش د خراسان څانګې فعالیت له دغه هېواد سره پر پوله د منځنۍ اسیا د هېوادونو لپاره ډېرې اندېښنې پیدا کړې دي.
د منځنۍ اسیا هېوادونو د داعش او افراطي اسلامپالو ډلو پر وړاندې جګړه د خپلو امنیتي پلانونو په سر کې ځای کړې ده.
تر دې وړاندې د تاجکستان حکومت هم د افغانستان له پولو څخه هېواد ته د مذهبي سخت دریځو ډلو د ننوتو په اړه اندېښنه ښودلې وه او له افغانستان سره په پوله کې یې له روسي ځواکونو سره ګډ تمرینات ښودلي وو.
که څه هم د قرغزستان اکثریت نفوس مسلمانان دي، خو د دغه هېواد حکومت سیکولر ارزښتونو ته غاړه ایښې او جهادي فعالیتونه دروي.
