د نړۍ مشران د اوکراین د سولې غونډه کې د ګډون لپاره په سویس کې راټول شوي دي
د څه باندې سلو هېوادونو او نړۍوالو سازمانونو استازي د سویس په پلازمینه کې راټول شوي چې د اوکراین د سولې په دوه ورځنۍ غونډه کې برخه واخلي.
تمه کیږي چې په دغه غوڼډه کې خبرې اترې په هغو پراخو اندېښنو چې د جګړې له امله رامنځته شوي لکه د خوړو او اټومي امنیت او سمندري ازادۍ تمرکز وکړي.
د سرچينو د معلوماتو له مخې، د دې غونډې د وروستۍ اعلاميې مسوده، چې د شنبې او يکشنبې په ورځو کې ترسره کېږي، روسيه د یو یرغلګر په توګه معرفي کوي.
خو د روسیې او د هغه د ځواکمنو متحدینو لکه چین، نه شتون د دې غونډې بالقوه اغیز کم کړی دی.
د جرمني لومړي وزیر اولاف شولتس دغه غوڼه د پرمختګ په لور یو مهم ګام وباله. هغه سویس ته له خپل سفر مخکې ولټ تلویزیون ته وویل: «د سولې او امنیت پر ډېرو مسایلو به خبرې وشي.»
تمه کیږي، چې د شاوخوا سلو هېوادونو او سازمانونو استازي به د سویس په پلازمینه کې د بورګن ستوک سیمه کې په دغې دوه ورځنۍ غونډه کې ګډون وکړي.
د روسیې ولسمشر ولادیمیر پوتین ویلي، چې که اوکراین له هغو ۴ سیمو پوځ وباسي چې مسکو یې خپلې بولي او هم په ناټو کې له غړیتوب تېر شي کرملین به اوربند او خبرې ور سره پیل کړي.
سویس چې دا سرمشریزه یې د اوکراین د ولسمشر ولادیمیر زلنسکي په غوښتنه جوړه کړې، غوښتل یې چې د سولې راتلونکي بهیر ته چې روسیه هم په کې شامله ده، لاره هواره کړي، خو جیوپولیټیک ویش د دې کار مخه ونیوله.
