د کرېکټ شل اوریز نړېوال جام؛ بنګله دېش له نیپال څخه د ۲۱ منډو په توپیر لوبه وګټله
د بنګله دېش لوبډلې له لوري نیپال ته په ماتې ورکولو سره د نړېوال جام د اتو غوره لوبډلو نوملړ بشپړ شو. د دغې سیالۍ د غوره لوبغاړي جایزه تنظیم حسین ته ورکړل شوه.
د ۲۰۲۴ کال د کرېکټ د شل اوریز نړېوال جام ۳۷مه لوبه د بنګله دېش او نیپال لوبډلو ترمنځ ترسره شوه.
د لوبې پچه نیپال لوبډلې وګټله او بنکله دېش لوبډلې ته یې د توپ وهنې بلنه ورکړه.
د بنګله دېش ټوله لوبډله په ۱۹،۳ اورونو کې د ۱۰۶ منډو جوړېدو وروسته وسوځېدله.
د بنګله دېش په ګټه شکیب الحسن ۱۷، رشاد حسین او محمد الله۱۳ ، ۱۳ تر نورو ډیرې منډې جوړې کړې.
د نیپال په ګټه سومپال کامي، سندیپ لامیچانه او روهیت پودل هر یوه د بنګله دېش دوه دوه لوبغاړي وسوځول.
د بنګله دېش لوبډلې د خپل ۱۰۶ منډو څخه په ښه ډول دفاع وکړه او د تنظیم حسین او مصطفیض الرحمن د ښې توپ اچونې په مټ یې د نیپال ټوله لوبډله ۱۹،۲ اورو کې وسوځوله.
د بنګله دېش له لوري د نیپال لوبډلې ته په ماتې ورکولو سره د نړېوال جام د اتو غوره لوبډلو نوملړ هم بشپړ شو.
د سږني نړېوال جام اته غوره لوبډلې په دوه ګروپونو وېشل شوې دي.
په لومړی ګروپ کې هند او افغانستان، اسټرالیا او بنګله دېش او په دویم ګروپ کې امریکا، انګلینډ، ویسټ اینډیز او سوېلي افریقا مخامخ دي.
