هندي چارواکو ویلي، چې د دوشنبې په ورځ د لوېدیځ بنګال په ایالت کې یو بار وړونکی اورګاډی له یوه مساپر وړونکي اورګاډي سره ټکر کړی، چې له امله یې لږ تر لږه پنځه کسان مړه شوي او ۳۰ نور ټپیان دي. د راپورونو له مخې دغه پېښه د نوي جالپایجوري ښار ته څېرمه رامنځته شوې ده.
همدارنګه د هند لومړي وزیر په خپله اېکس پاڼه د یادې پېښې په اړه خواشیني ښودلې.
نوموړي لیکلي، په یاده پېښه کې د ټپي شویو کسانو د ژغورنې عملیات روان دي.
نریندرا مودي وايي، د یادې پېښې د ارزونې په موخه یې د ریلوې وزیر اشواني ویشناو د پېښې سیمې ته استولی دی.
د حوثیانو ویاند په یکشنبه ویلي، دغې ډلې په سور سمندرګي او عربي بحیره کې د امریکا پر یوې بیړۍ او دوو کښتیو بریدونه کړي. یحیا سريع ویلي، حوثیانو په یوه بالستیک توغندي، امریکايي بیړۍ او د کیپټن پاریس په کښتۍ د سمندري توغندي او د «هیپي کنډور» پر کښتۍ د ډرون توغندي بریدونه کړي.
دا څرګنده نه ده چې د حوثیانو توغندي او بې پیلوټه الوتکې خپل هدفونه په نښه کړي او که نه.
تر دې مخکې د برېټانیا سوداګریزو سمندري عملیاتو کې ویل شوي و، چې یوې کښتۍ د یمن په سوېلي اوبو کې د دوو چاودنو خبر ورکړی و. ورته مهال کښتۍ او د هغې مساپر خوندي پاتې شول او خپل سفر ته ېې دوام ورکړی.
حوثیانو له فلسطینیانو سره په پیوستون کې د تیر کال له نومبر میاشتې راهیسې په سوداګریزو کښتیو لسګونه بریدونه کړي دي.
دغه بریدونه په یمن کې د حوثيانو پر وړاندې د امریکا او برېتانیې له خوا د بېړیو د تګ راتګ او د غچ اخیستنې د بریدونو لامل شوي دي.
تحریک طالبان پاکستان په پاکستان کې د لوی اختر په مناسبت درې ورځنی اوربند اعلان کړ. ټي ټي پي د یوې خبرپاڼې په خپرولو سره ویلي؛ چې دغه اوربند د پاکستان د خلکو په غوښتنه اعلان شوی، خو که امنیتي ځواکونه کوم ګام واخلي، د دوی جنګیالي به له ځانه دفاع وکړي.
له ۲۰۲۱ کال وروسته دا دویم ځل دی چې تحریک طالبان پاکستان د اوربند اعلان کوي.
لومړی اوربند په ۲۰۲۲ کال کې پای ته ورسېد او له هغه وروسته پاکستاني طالبانو د پاکستان په بېلابېلو سیمو کې خپلو بریدونو ته زور ورکړی دی.
د ټي ټي پي د بریدونو شدت د پاکستان او افغان طالبانو ترمنځ اړیکې ترینګلې کړې.
اسلام اباد وايي، د پاکستاني طالبانو مشران په افغانستان کې اوسیږي.
همدارنګه اسلام اباد ادعا کوي چې ټي ټي پي خپل بریدونه د افغانستان له خاورې ترسره کوي، خو دا تور د تحریک طالبان پاکستان او افغان طالبانو لخوا رد شوی دی.
د اسراییل پوځ د یکشنبې په ورځ وویل، چې د غزې په سویلي برخه کې د یوې لویې لارې په اوږدو کې یې نظامي عملیات لازیاتو مرستو ته د اجازې ورکولو په موخه درولي دي. دغه مرستې به هغو سیمو ته رسیږي چیرې چې نړۍوالو مرستندویه سازمانونه د مخ په زیاتیدونکي بشري ناورین خبرداری ورکوي.
پوځ وویل، چې په رفح ښار کې به جګړه دوام وکړي.
دا هغه سیمه ده چې اسراییل وايي؛ دلته د حماس وروستۍ پاتې لېوا په نښه کوي.
پوځ ویلي، چې نظامي عملیات به د دغې لارې په اوږدو کې د سهار له پنځو بجو د مازیګر تر پنځو بجو پورې ولاړ وي.
د اوربند لپاره د نړۍوالو فشارونو سربېره؛ د جګړې د درولو موافقه لاهم لرې ښکاري.
په لبنان کې د ایران له ملاتړه برخمنه حزب الله په غزه کې د حماس له برید لږ وروسته د اسراییل پر وړاندې دویمه جبهه پرانستې.
د اسراییل او لبنان د پولې په اوږدو کې جګړه اوس په یوې پراخې جګړې د بدلیدو په حال کې ده.
د پولې دواړو غاړو ته په اسراییل او لبنان کې په لسګونو زره خلک بې کوره شوي دي.
په غزه کې د جګړې د اوږدیدو یوه بله نښه دا ده، چې د لومړي وزیر بنیامین نتنیاهو حکومت د یکشنبې په ورځ اعلان کړی، چې د هغو اسراییلیانو لپاره به د هوټلونو د پیسو د ورکولو موده د اګسټ تر ۱۵مې پورې وغځوي، چې د اسراییل د سویلي سیمو څخه د نښتو په پایله کې بې ځایه شوي دي.
حماس د اکټوبر په اوومه د اسراییل په سویلي سیمو برید وکړ، چې د اسراییل د شمېرو له مخې پکې ۱۲۰۰ کسان ووژل شول او تر ۲۵۰ زیات د حماس له خوا یرغمل شول.
د غزې د روغتیا وزارت په وینا؛ له هغه مودې راهیسې په غزې د اسراییل د عملیاتو په پایله کې لږ تر لږه ۳۷ زره ۲۹۶ فلسطینیان وژل شوي دي.
د حماس د سیاسي دفتر مشر اسماعیل هنیه اعلان وکړ، چې د غزې په تړانګه کې د اوربند وروستي وړاندیز ته د دې ډلې غبرګون د هغه څه سره سمون لري، چې د امریکا ولسمشر جوبایډن مخکې وړاندیز کړی و.
هنيه د لوی اختر په مناسبت په يوه ټلويزيوني وينا کې وويل: "حماس او فلسطيني ډلې د يوې هر اړخيزې موافقې لپاره چمتو دي، چې پکې اوربند، د غزې له تړانګې څخه د اسرایيلي پوځ وتل، د کنډوالو بيارغونه او د تبادلې هر اړخيز تړون شامل دی."
له دې وړاندې د امریکا ولسمشر جو بایډن په غزه کې د جګړې د درولو لپاره درې پړاویز پلان اعلان کړ او ویې ویل، چې دا تړون کولای شي د حماس له خوا د یرغمل شویو بندیانو د خلاصون او د جګړې د پای ته رسولو لپاره لاره هواره کړي.
مصر او قطر د اوربند د خبرو د منځګړیتوب په توګه بیا ویلي وو، چې حماس د بایډن پلان ته خپل ځواب وړاندې کړی دی.
دغو دواړو هېوادونو په دې اړه له نورو جزییاتو ورکولو ډډه کړې ده.
جرمني رسنیو راپور ورکړی، چې د جرمني د کورنیو چارو وزارت یو پلاوی د می په میاشت کې تاشکند ته سفر کړی، چې د یو شمېر افغان کډوالو د اېستلو په اړه خبرې وکړي. د رېپوټ له مخې؛ ازبک چارواکو له جرمني غوښتي، چې د همکارۍ په بدل کې دې د دغه هېواد مسلکي کارګرانو ته ځای ورکړي.
د دغو راپورونو له مخې؛ د ازبکستان مشرتابه د مرستې ژمنه کړې، خو په بدل کې یې د کډوالۍ د یوې هوکړې کولو غوښتنه کړې، تر څو ازبک وګړي په اسانۍ سره جرمني ته د کار لپاره ولاړ شي.
شپیګل ورځپاڼې راپور ورکړی، چې په دې اړه یې د جرمني د کورنیو چارو وزارت نظر غوښتی؛ خو دغه وزارت ونه غوښتل چې په دې اړه تبصره وکړي.
جرمني رسنيو د غبرګولي په ٢٧مه خبر ورکړى، چې جرمني غواړي له طالبانو سره د همکارۍ د مخنيوي په موخه ازبکستان ته د اخراج وړ افغان کډوال ولېږدوي.
د جرمني د کورنیو چارو وزیرې نانسي فایزر ویلي؛ هېواد یې په دې اړه له ازبک چارواکو سره خبرې کوي.
د راپورونو له مخې؛ جرمني د افغان کډوالو د اخراج پلان داسې دی، چې افغان کډوال د خصوصي هوايي شرکتونو له لارې تاشکند ته استول کېږي او له هغه ځایه کابل ته لېږدول کېږي.
په دې وروستیو اونیو کې په جرمني کې د مېشتو افغانانو له خوا د بریدونو په اړه څو رپوټونه خپاره شوي دي.
د جرمني پولیسو د شنبې په ورځ (د غبرګولي ۲۶مه) اعلان وکړ، چې په لویدیځ برلین کې یې د یورو ۲۰۲۴ کال د فوټبال د سیالیو د پرانیستلو په لوبه کې یو افغان وګړي وروسته له هغه په پښه ډزې وکړې چې یو هېوادوال یې وواژه او پر نندارچیانو یې برید وکړه.
د جرمني پوليسو د غبرګولي په ٢٢مه اعلان وکړ، چې يو ١٩ کلن افغان ځوان يې د فرانکفورت په ښار کې پر يوې ٤١ کلنې جرمنۍ ښځې د چاقو د بريد په تور نيولى دى.
همدغه راز دجمعې په ورځ هم يو ٢٥ کلن سليمان عطایي په منهايم ښار کې داسلام د مخالفينو په يوه غونډه بريد کې يو پوليس وژلى او پينځه ملکي کسان يې ژوبل کړي وو.
په دې وروستیو کې د جرمي صدراعظمې اولاف شولز هم خبرداری ورکړی، چې دغه هېواد به نور د «ترهګریزو اعمالو» ستاینه ونه زغمي.