د ترکیې حریت ورځپاڼې نن په خپل راپور کې ويلي، چې انقرې روسیې ته د معلوماتو په ورکولو سره په مسکو کې په یوه لوی پلورنځي کې د داعش د دویم برید مخه ونیوله. دغې ورځپاڼې لیکلي، چې ترکیې دغه معلومات وروسته له هغه ترلاسه کړل، چې داعش په استانبول کې پر یوې کلیسا برید وکړ.
حریت په راپور کې لیکلي، چې د روان کال په جنورۍ میاشت کې په استانبول کې پر سانتا ماریا کلیسا د برید په تړاو د داعش ډلې د یوه غړي له نیول کېدو وروسته ترک چارواکو د داعش د هغو غړو په اړه معلومات او نومونه ترلاسه کړل، چې په مسکو کې يې د دویم برید پلان درلود.
حریت وايي داعش ډلې د کنسرت پر تالار له برید وروسته په مسکو کې د دویم برید پلان جوړ کړی و.
حریت ورځپاڼې په کابل کې پر هغه هوټل، چې چینایان اوسیږي د داعش ډلې برید ته په اشارې سره ټینګار کړی، چې ایران، ترکیه او مسکو د دغې ډلې د بریدونو نور هدفونه وو.
دغې رسنۍ لیکلي: « انقره له ډېرې مودې راهیسې د داعش خراسان د فعالیتونو په اړه خبرداری ورکوي، خو د داعش ګواښ له منځه نه دی تللی او لا هم سېمه ګواښي.»
دې ورځپاڼې دا هم لیکلي، چې د مسکو پر تالار د برید دوه بریدګر د څه مودې لپاره ترکیې ته د خپل اوسېدو د اسنادو غځولو په موخه ننوتي وو او په دغه هېواد کې موجود وو.
تېر مارچ مسکو ته څېرمه د کنسرت په تالار کې د داعش ډلې برید تر سلو زیات کسان ووژل او لسګونه نور یې ټپیان کړل.
