د روسیې د بهرنیو چارو وزیر د جمعي په ورځ د ډله ییز امنیت د تړون سازمان په غونډه کې ویلي و؛ چې له افغانستانه ګواښونه دوام لري، خو د باثباته، تلپاتي او بنسټیزو خبرو اترو په موخه له طالبانو سره د ځانګړو پروژو پلي کولو ملاتړ کوي.
د طالبانو د بهرنیو چارو وزارت د یکشنبې په ورځ د (چنګاښ درېیمه) د یوې خبرپاڼې په خپرولو سره ویلي، چې د روسیې د بهرنیو چارو وزیر سرګي لاوروف د هغو څرګندونو هرکلی کوي، چې له دغې ډلې سره یې د باثباته، دوامدارو خبرو اترو ملاتړ کړی دی.
د روسیې د بهرنیو چارو وزیر سرګي لاوروف دوه ورځې وړاندې د قزاقستان په الماتا ښار کې د ډله ییز امنیت د تړون سازمان د بهرنیو چارو وزیرانو سره له کتنې وروسته خبرداری ورکړ چې: «ګواښونه لا هم له افغانستان څخه سرچینه اخلي.»
سرګي لاوروف ویلي و؛ چې له ترهګرۍ سره د مبارزې په موخه له طالبانو سره د لا زیاتو بنسټیزو خبرو اترو اړتیا ده.
طالبانو په خپله خبرپاڼه کې ویلي؛ چې دغې ډلې تل ټینګار چې د یو مسوول حکومت په توګه چمتو دي، چې له ټولو لوریو سره پرګډو مسلو پراخې او پایله لرونکي خبرې اترې ولري.
د طالبانو بهرنیو چارو وزارت په دغې خبرپاڼه کې د روسیې په ګډون نورو هېوادونو ته د پخوا په څېر د امنیت ډاډ ورکړل شوی.
