د ایران بهرنیو چارو پخواني وزیر جواد ظریف په اېکس ټولنیزه پاڼه په یوه بحث کې ویلي، چې امریکا په افغانستان کې له شل کلن شتون وروسته د وتلو لپاره، له طالبانو سوالګري وکړه. د ایران بهرنیو چارو پخوانی وزیر وايي، د عراق او افغانستان په ګډون د امریکا ډیری محاسبې ناسمې دي.
ښاغلي ظریف د شنبې ورځې په ماښام د (چنګاښ دویمه) د ایران د ولسمشریزو ټاکنو په اړه په اېکس پاڼه بحث کې، په سیمه کې د امریکا د ناسمو کړنو په اړه خبرې وکړې.
ښاغلي ظریف وویل؛ چې د اوکراین په اړه د امریکا محاسبه سمه وه ځکه چې د ده په وینا واشنګټن وکولای شول چې روسیه په اوکراین کې بوخته کړي.
په دې وروستیو کې د افغانستان د ملي امنیت پخواني مشر احمدضیا سراج له ان هیډ ویبپاڼې سره په مرکه کې ویلي؛ چې ایران له افغانستان څخه د امریکا د وتلو بهیر د ګړندي کولو لپاره له طالبانو څخه د یوې وسیلې په توګه کار واخیست.
د ان هیډ ویبپاڼې د راپور له مخې، د ۲۰۲۰ کال په جنورۍ کې د امریکا له خوا د قاسم سلیماني له وژل کېدو وروسته، ایران په مشهد کې د طالبانو دفتر پرانیست.
د افغانستان د ملي امنیت پخواني مشر په دې مرکه کې ویلي چې تهران غوښتل په دې کار سره له امریکا غچ واخلي.
په ۲۰۰۱ کال کې پر افغانستان د امریکا له برید وروسته ایران د بن په غونډه کې مهم رول ولوباوه.
د افغانستان لپاره د امریکا د بهرنیو چارو وزارت استازي زلمي خلیلزاد په خپل کتاب کې لیکلي؛ چې جواد ظریف په هغه وخت کې په افغانستان کې د حکومت او نوي سیاسي نظم په جوړولو کې له امریکا سره همکاري وکړه.
ښاغلي ظریف په دې وروستیو کې وویل چې ایران د بن په غونډه کې خپلې ټولې غوښتنې پوره کړې.
