د امریکا د پخواني ولسمشر ډونالډ ټرمپ دوو مشهورو سلاکارانو د اوکراین د جګړې د پای ته رسولو لپاره داسې پلان وړاندې کړی، چې د امريکا د راتلونکو ټاکنو تر ګټلو وروسته به عملي شي.
دا پلان به له اوکراین سره د واشنګټن د مرستو چمتو کول د دې هېواد د موافقې پورې مشروط وي،چې له روسیې سره د سولې خبرې پیل کړي.
رویټرز خبري اژانس د سې شنبې په ورځ (د چنګاښ ۵ مه) په یوه ځانګړي راپور کې لیکلي، چې د دغه پلان په چوکاټ کې به امریکا روسیې ته هم خبرداری ورکړي، چې که دغه هېواد د سولې له خبرو سره مخالفت وکړي واشنګټن به کییف ته نورې وسلې ورکړي.
دا طرحه د کیت کيلاف او فریډ فیلټز له خوا چمتو شوې ده.
دا دواړه د ټرمپ د ولسمشرۍ پر مهال د امریکا د ملي امنیت د عالي شورا له مشرانو څخه وو.
روسیې د ۱۴۰۰ کال (د کب ۵ مه) د اوکراین پر وړاندې خپل پوځي عملیات پیل کړل او له هغه وخت راهیسې د دواړو هېوادونو ترمنځ مرګونې نښتې روانې دي.
تر دې مخکې د غبرګولي په ۱۳مه د اوکراین ولسمشر ولادیمیر زلنسکي د ټرمپ د احتمالي پرېکړې په اړه اندیښنه څرګنده کړه، چې که چیرې هغه د امریکا راتلونکې ولسمشریزې ټاکنې وګټي په کیيف باندې به «د سولې ناوړه پلان» تحمیل کړي.
زلنسکي زیاته کړه، چې د ټرمپ دا ډول اقدام به هغه یو «بايلونکی ولسمشر» کړي او د «نړۍوال لوبغاړي» په توګه به د امریکا رول پای ته ورسوي.
رویټرز د خپل خبر په دوام لیکلي، چې د ټرمپ د سلاکارانو پلان به د کییف او مسکو ترمنځ اوربند د «جګړې د ډګر د حاکمو کرښو» پر بنسټ رامنځته شي.
د فلیټز په وینا دا پلان ټرمپ ته وړاندې شوی او هغه په دې اړه مثبت نظر څرګند کړی دی.
په ورته وخت کې فلیټز زیاته کړه: «زه دا ادعا نه کوم، چې ټرمپ د پلان «له هرې توري» سره موافق دی.»
د رویټرز په وینا دا پلان د اوکراین د شخړې په اړه د واشنګټن په دریځ کې د پام وړ بدلون معنی لري، چې د امریکا د اروپايي متحدینو او حتی د جمهوري غوښتونکو ګوند ځینې غړي به یې مخالفت وکړي.
