امریکا د سپاه پاسداران او دفاع وزارت اړوندو کسانو او بنسټونو باندې بندیزونه ولګول
امریکا د سې شنبې په ورځ (د چنګاښ ۵ مه) د ایران پوځي ځواکونو ته د ميلیاردونو ډالرو په انتقال کې د لاس لرلو په تور پر څه باندې پنځوسو کسانو او سازمانونو بندیزونه ولګول.
امریکا د سې شنبې په ورځ (د چنګاښ ۵ مه) د ایران پوځي ځواکونو ته د ميلیاردونو ډالرو په انتقال کې د لاس لرلو په تور پر څه باندې پنځوسو کسانو او سازمانونو بندیزونه ولګول.
د امریکا د خزانې وزارت په یوې اعلاميه کې ويلي، چې دغو کسانو او بنسټونو د «سایه بانکدارۍ شبکه» جوړه کړې، چې د سپاه پاسداران او د ایران د دفاع او د اسلامي جمهوریت د وسله والو ځواکونو د ملاتړ وزارتونو له خوا کارول کېده.
د ایران د حکومت دغه دوه پوځي بنسټونه د امریکا د بندیزونو په لېست کې دي.
د امریکا د خزانې وزارت ویلي، چې دې بانکي شبکې د سپاه پاسداران او دفاع وزارت نړۍوال مالي سیسټم ته د لاسرسي زمینه برابره کړې او د هغو ملیاردونو ډالرو په انتقال کې یې مرسته کړې چې دغو دوو بنسټونو له ۲۰۲۰ کال راهیسې د تېلو او پټرو کیمیکل محصولاتو له خرڅلاو ترلاسه کړي و.
د امریکا د خزانې وزارت په وینا، سپاه پاسداران او دفاع وزارت خپل عایدات د ایران د صرافیو او د بهرني شرکتونو د پوښښ له لارې په سیمه کې د یمن د حوثیانو په ګډون د اسلامي جمهوریت د نیابتي ډلو مالي ملاتړ او وسلو لپاره مصرفول.
د ۱۴۰۲ کال (د لړم ۱۰ مه) د ایران مشر علی خامنه يي اسراییل ته د تېلو او خوراکي توکو د صادراتو پر بندولو ټینګار وکړ او له اسلامي حکومتونو څخه یې وغوښتل، چې له اسراییل سره اقتصادی ملګرتیا ونه کړی.
د خامنه يي له څرګندونو وروسته حوثيانو په سور سمندرګي، د باب المندب تنګي او د عدن په خلیج کې پر نړۍوالو بېړیو بریدونه پیل کړل، چې په سیمه کې یې د تګ راتګ امنیت له خطر سره مخامخ کړ.
واشنګټن د غبرګولي په ۲۱ نېټه د يمن حوثيانو ته د تېلو او نورو توکو په غيري قانوني لېږد کې د رول له امله پر ۱۰ کسانو، شرکتونو او کښتيو بنديزونه ولګول.
