معتبره سرچېنې : د طالبانو د مشر اړیکې له امیر خان متقي سره خړې پړې شوې دي
معتبرو سرچېنو افغانستان انټرنشنل ته ویلي، چې د طالبانو د مشر ملا هبتالله اخندزاده اړیکې د دغې ډلې د بهرنیو چارو له وزیر امیرخان متقي سره خرابې شوې دي.
معتبرو سرچېنو افغانستان انټرنشنل ته ویلي، چې د طالبانو د مشر ملا هبتالله اخندزاده اړیکې د دغې ډلې د بهرنیو چارو له وزیر امیرخان متقي سره خرابې شوې دي.
په دې وروستیو کې طالبانو د امیر خان متقي پر ځای د دغې ډلې مرکزي ویاند ذبیحالله مجاهد د دوحې په درېیمه ناسته کې د ګډون لپاره ټاکلی دی.
که څه هم چې د بهرنیو چارو وزارت پراخه جوړښتونه لري او دغه بنسټ له وزیر پرته سیاسي او اداري مرستیالان او بېشمېره رییسان لري؛ خو دغې ناستې ته د ذبیح الله مجاهد ګومارنې بېلابېلې پوښتنې راولاړې کړې دي.
دغه سرچېنې وايي، له هغه مهاله چې د ذبیح الله مجاهد دفتر کندهار ته لېږدول شوی؛ نو ورسره هممهاله د هغه واک هم تر پخوا زیات شوی دی.
سرچېنې وایي، چې ذبیحالله مجاهد ملا هبت الله ته ډېر نږدې او وفاداره کس دی.
هغه یواځینی چارواکی دی، چې دفتر یې له هغې وروسته چې کندهار د «طالبانو په سیاسي پلازمېنې» بدل شو، دغه ولایت ته لېږدول شوی دی.
ښاغلی مجاهد د طالبانو په واکمنۍ کې تر ویاندویۍ اوچت ځای ځایګی لري.
سرچېنې وایي، چې د طالبانو په حکومتولۍ کې د هغه واکونه تر ډېرو وزیرانو هم پورته دي.
د دوحې په درېیمه ناسته کې د خبرو اترو لپاره د طالبانو په استازولۍ د ذبیح الله مجاهد ټاکنه د دې ښکارندویي کوي، چې نوموړی د ملاهبت الله ډېر باوري او نږدې کس دی.
په خارجي سیاست کې د ښاغلي مجاهد وروستۍ څرګندونې دا په ډاګه کوي، چې هغه د یو ویاند له دریځه پورته د بهرنیو چارو د وزیر په بڼه چارې پر مخ وړي.
نوموړي په وروستیو ورځو کې د طالبانو د ډیپلوماسۍ بنسټ د مشر له دریځه غږېدلی دی.
هغه د طلوعنیوز سره په خبرو کې د چین د ولسمشر له هغو څرګندونو هم مننه کړې، چې د افغانستان سره یې د اړیکو د پیاوړي کولو په تړاو کړې وې.
دا رنګه ښاغلي مجاهد د طالبانو په استازیتوب د ایران د ولسمشریزو ټاکنو په اړه هم غږېدلی او دا یې ویلي، چې د دوی رژیم د ایراني لوري سره د ښو اړیکو ملاتړی دی او هیله یې ښکاره کړې، چې د ایران راتلونکی دولت به هم له دوی سره د دغه اړیکو دوام او پرمختیا ته ژمن پاتې شي.
تر اوسه روښانه نه ده، چې د ملا هبت الله او متقي تر منځ به د اړیکو ترینګلتیا پر کوم لوري ولاړه شي او ذبیخ الله مجاهد به تر دې ډېر څومره سیاسي او اداري واګې تر لاسه کړي.
