د طالبانو سترې محکمې په خبرپاڼه کې ويلي، چې په سويلي ولایت روزګان کې يې ۱۸ کسانو ته د «غلا، لواطت او نامشروع اړيکو په تور » سزا ورکړه. تېره ورځ د دې ولایت طالبانو له ملکي خلکو غوښتي وو، چې د دې تورنو کسانو د وهلو نندارې ته ورشي.
د طالبانو سترې محکمې د سې شنبې په ورځ په خبرپاڼه کې ويلي، چې دغو کسانو ته یې د روزګان په ورزشي لوبغالي کې په عام محضر کې سزا ورکړې.
اعلاميه زياتوي، چې «دغه کسان جرمونو ته په پام له ۲۰ تر ۳۹ درې ووهل شول او له یوه تر دوو کلونو د تنفيذي بند سزا ورکړل شوه.»
په اعلاميه کې راغلي، چې پر دې کسانو د «سويلي حوزې د تميز مقام» د سزا د تطبيق پرېکړه کړې.
تر دې يوه ورځ مخکي د روزګان سیمه ییزو طالبانو له خلکو غوښتي، چې دغو کسانو ته د سزا ورکولو په ننداره کې ګډون وکړي.
د طالبانو د والي دفتر ټینګار کړی و، چې د دغو کسانو د سزا ورکړې ځای ته د هر ډول ټیلیفون او کامرې وروړل په «جدي توګه منع» دي.
طالبانو، نن په بادغېس، پنجشېر او پروان کې هم څو کسانو ته د مختلفو جرمونو په تور سزا ور کړه.
طالبانو په عام محضر کې په دورو وهل او ورته جسمي سزاګانې عامې کړي دي، په داسې حال کې چې د بشري حقونو سازمانونو په پرله پسې ډول پر دغه ډول سزاګانو نیوکې کوي او وايي دا د هر ډول انساني او بشري حقونو خلاف عمل دی.
