د هند د عوایدو د معلوماتواداره وايي، په ممبۍ کې د افغانستان د پخوانۍ سر کونسلې ذکیه وردګ د ۲۵ کیلو ګرامه سرو زرو د قاچاق په قضیه کې ۴ زرګران نیول شوي دي. له ذکيه وردګ سره په تېر اپرېل کې د هند په ممبۍ هوايي ډګر کې د ٢،٢ ميليونو ډالرو په ارزښت د ٢٥ کيلو ګرامه سره زر وموندل شول.
انډیاټایمز نن خبر ورکړ، چې په ممبۍ کې د افغانستان د کونسلګرۍ یو کارکوونکی رفیع الله کلیوال هم په دې قضیه کې لاس لري.
د هند د عوایدو د څانګې د څېړنو له مخې، ذکیه وردګ د ۲۰۲۴ کال په جنورۍ میاشت کې په دغو زر پلورو کې له یوه سره ليدلي و.
په دې ليدنه کې يې رفيع الله کليوال يو زرګر ته معرفي کړ، چې د نغدو پيسو په بدل کې دې يو زرګر ته ٢٠٠ کيلو ګرامه سره زر ورکړي.
دغه ادارې زياتوي، چې يوه نیول شوي کس اعتراف کړى، چې د جنورۍ له لومړۍ تر اپریل میاشتې پورې دوو نورو ګاڼو پلورونکو ۳۰۰ کیلو ګرامه قاچاق شوي سره زر په هغو پیرودونکو پلورلي، چې هغې د نغدو پیسو په بدل کې د سودا لپاره معرفي کړي وو.
د هند د معلوماتو ادارې ویلي، چې په دې اړه څېړنې روانې دي او پولیس هڅه کوي، چې د دغو ګاڼو اصلي غړي ونیسي.
د هند د عوایدو د معلوماتو ادارې چارواکي وايي، څېړنو څرګنده کړې، چې د روان کال په لومړیو څلورو میاشتو کې ۳۰۰ کیلو ګرامه بهرني مهر لرونکي سره زر هند ته قاچاق شوي دي.
د دې ادارې د مسوولینو په خبره، مېرمن وردګ ښايي په تېرو وختونو کې هم دغه هېواد ته سره زر قاچاق کړي او پر زرګرانو یې پلورلي وي.
د اپریل په ۲۵ مه مېرمن وردګ پلان درلود، چې ۲۵ کیلو ګرامه سره زر له دوبۍ څخه هند ته قاچاق کړي چې ممبيي هوايي ډګر کې رسوا شوه.
په ممبۍ کې د افغانستان جنرال کونسلې ذکیه وردګ د سرو زرو په قاچاق کې د لاس لرلو په اړه د رپوټ له خپرېدو څو ساعته وروسته له خپلې دندې استعفا وکړه.
هندي چارواکو ویلي، چې ذکیه وردګ ځکه نه ده نیول شوې، چې ډیپلوماټیک خونديتوب لري.
نوموړې د اشرف غني د حکومت له خوا په ممبۍ کې د افغانستان په کونسلګرۍ کې وګومارل شوه.
نوموړې لومړنۍ افغان ډیپلوماټه ده چې له طالبانو سره یې همکاري پیل کړه.
