د خوړو نړۍوال پروګرام وايي، په افغانستان کې ډېری ماشومان په تش نس ښوونځيو ته ځي. دغه پروګرام د یوه راپور په خپرولو سره ویلي، چې روان اقتصادي کړکېچ او وچکالۍ ګڼې کورنۍ اغېزمنې کړې دي.
دغه پروګرام پر دغو زدهکوونکو د ښوونځي خواړه وېشي.
دغه پروګرام وایي، د ښوونځيو خواړه هغه څه دي چې دوی روغ ساتي او په خپلو درسونو ښه تمرکز کولای شي.
په راپور کې راغلي، په ښوونځيو کې ډوډۍ اکثره د هغو زدهکوونکو لپاره د ورځې لومړني خواړه وي، چې له سهارنۍ پرته په تش نس له کوره وځي.
ورته مهال د افغانستان لپاره د اروپایي ټولنې سفیرې رافایلا ایوډیس ویلي، لوږه کېدای شي د زدهکړې پر وړاندې یو خنډ وي.
دغې ټولنې د خوړو نړۍوال پروګرام سره د همکارۍ په پار په افغانستان کې د ښوونځي د تغذیې پروګرام لپاره د لس مېلیونه یورو مرسته اعلان کړې.
اغلې رافیلا وایي:« موږ له دغې مرستې سره ډاډ ورکوو، چې په افغانستان کې ډېری ماشومان به تغذیه شوي خواړه ترلاسه کړي.»
په راپور کې راغلي، د اروپایی ټولنې دغه مرسته به وکولای شي چې په اتو ولایتونو کې له لس زرو څخه پر زیاتو ښوونځیو کې زدهکوونکو ته تغذیه شوي خواړه ووېشي چې خورا لوړ خوراکي خوندیتوب لري.
دغه پروګرام تېرکال کې د بودجې د کمښت له امله له لس مېلیونو بې وزلو خلکو سره د بېړنیو خوراکي توکو مرسته درول وه.
