طالبانو په هلمند کې درې کسان د غلا په تور په عام محضر کې په دورو وهلي
د طالبانو ستره محکمه وايي، دغو کسانو ته د هلمند ولایت د باباجي ولسوالۍ د سپین جومات په سیمه کې د عامو خلکو د سترګو په وړاندې سزا ورکړل شوې ده.
د طالبانو ستره محکمه وايي، دغو کسانو ته د هلمند ولایت د باباجي ولسوالۍ د سپین جومات په سیمه کې د عامو خلکو د سترګو په وړاندې سزا ورکړل شوې ده.
تېره ورځ په هلمند ولایت کې د طالبانو د اطلاعاتو او کلتور ریاست له لوري په یوه خپره شوې خبرپاڼه کې ولسي خلکو ته هم بلنه ورکړل شوې وه، چې دغو کسانو ته سزا ورکول له نږدې ننداره کړي.
د طالبانو سترې محکمې د سه شنبې په ورځ د (وږي شپږمه) د یوې اعلامیې په خپرولو سره ویلي، چې د هلمند ولایت په باباجي ولسوالۍ کې یې دریېو کسانو ته د غلا په تور تعزیري سزا ورکړې ده.
په اعلامیه کې د یادو کسانو د هویت په اړه څه نه دي ویل شوي.
د طالبانو ستره محکمه وايي، دوه کسان یې ۳۹ دورې وهلي او په دوه، دوه کاله تنفیذې بند یې محکوم کړي او درېیم کس یې ۳۰ دورې وهلی او د اتو میاشتو تنفیذي بند سزا یې ورکړې ده.
په خبرپاڼه کې ویل شوي، چې یادو کسانو ته د سزا ورکولو پر مهال د دغې ولسوالۍ سیمهییز طالب چارواکو او سلګونو عامو کسانو هم ګډون درلود.
تېره ورځ هم طالبانو په زابل ولایت کې ۱۲ کسانو ته د «نامشروع اړیکو، د ښځې تښتونې او قتل» په تور په عام محضر کې سزا ورکړې وه.
په افغانستان کې واک ته د طالبانو له رسېدو سره سم بدني سزاوې بیا پيل شوې دي.
د بشري حقونو فعالان وايي، چې دا ډول سزاګانې د دفاع او عادلانه محاکمې حق ته د درناوي پرته تر سره کېږي او په پلې کولو سره یې انساني کرامت تر پښو لاندې کېږي او په ټولنه کې وېره هم رامنځته کوي.
