شهباز شریف: ترهګر له افغانستانه فعالیت کوي، نه له دوښمن سره خبرې کوو او نه هم نرمښت ښیوو
د پاکستان لومړي وزیر دویم ځل په ټينګار سره ویلي، چې ترهګر د افغانستان له خاورې په پاکستان کې بریدونه کوي.
شهباز شریف په بلوچستان ایالت کې د ملکي کسانو د وژلو په غبرګون کې وویل:« نه له دوښمن سره خبرې کوو او نه هم ورسره له نرمښته کار اخلو.»
نوموړي د کابینې غړو ته په خبرو کې همداراز زیاته کړه، چې د ترهګرۍ د له منځه وړلو وخت را رسېدلی او پر وړاندې یې هر ډول اقدام ته چمتو دي. شهباز شريف وایي، چې ترهګر غواړي د پاکستان او چين تر منځ فاصله پيدا کړي او د سي پېک پروژې مخه ونيسي. نوموړی دغه خبرې په داسې حال کې کوي، چې تېره ورځ په بلوچستان کې د پوليسو پر مرکزونو، د اورګاډي پر لیکو او د لویو لارو پر ګاډو د بېلتون غوښتونکو په بریدونو او د پوځ په ځوابي ډزو کې لږ تر لږه ۶۰ کسان وژل شوي دي. د پاکستان پوځ ویلي، له بریدونو وروسته په نښتو کې ۱۴ امنیتي ځواکونه او ۲۱ وسلهوال وژل شوي دي. د پاکستاني چارواکو په خبره بیا، وسلهوالو په وروستیو بریدونو کې پر لویه لار بسونه او بار وړونکي لارۍ په نښه کړي، چې لږ تر لږه يې ۲۳ مسافر وژلي او ۳۵ موټر يې سوځولي دي. که څه هم تر دې وړاندې پاکستاني چارواکو په ځلونو ویلي، چې طالبانو د ټيټيپي په ګډون یو شمېر ترهګرو ډلو ته په افغانستان کې امن ځایونه ورکړي؛ خو طالبانو تل دا تورونه رد کړي دي.
د طالبانو ویاند ذبیح الله مجاهد د «امربالمعروف او نهې عن المنکر» د قانون په اړه د یوناما او ځینو نورو جهتونو اندېښنې بې اساسه وبللې.
مجاهد زیاته کړې، چې کوم مسلمانان یاد قانون ردوي هغوی د ایمان له زوال سره مخ دي.
نوموړي ویلي، هر هغه غیر مسلمان چې د یادو قوانینو په اړه اندېښنه ښيي او یا یې ردوي باید ځان په اسلامي قوانین پوه او درناوی یې وکړي.
د مجاهد له قوله په یوې خپره شوې خبرپاڼه کې راغلي: «موږ ټولو جهتونو ته وایو دغه شرعي قوانین له اسلامي مصادرو څخه اخذ شوي او د اسلامي شريعت د حنفي فقهې په رڼا کې ترتيب شوي دي. د هر قانون، هرې مادې او فقرې تخريج يې د فقهې له معتبرو او منل شويو مصادرو څخه شوی، ټول مصادر او منابع يې هملته ور لاندې ليکل شوي.» د یادې ډلې په خبرپاڼه کې د امربالمعروف او نهې عن المنکر قانون پر وړاندې د یوناما په ګډون د ځینو جهتونو اعتراض ګستاخي بلل شوې ده. ذبیح الله مجاهد زیاته کړې ده، چې که دا قانون د مسلمانانو له خوا ردیږي او نیوکه پرې کیږي؛ نو له دین څخه د دوی د بې خبرۍ په معنا ده او ایمان یې له زوال سره مخ دی. نوموړي په ټولو مسلمانانو غږ کړئ: «په دغو اسلامي قوانینو چې د شریعت احکام دي، ځانونه پوه کړئ او له خپلو علماو څخه په دې اړه پوښتنې وکړئ.» د طالبانو ویاند ویلي، چې افغانستان یو اسلامي هېواد دی او په اسلامي ټولنه کې اسلامي قوانین د اجرا وړ دي. ښاغلی مجاهد وایي، چې د دغو اسلامي قوانینو د پلي کولو په برخه کې دې هېڅوک اندېښنه نه لري؛ ځکه قوانین د هېچا لپاره هم محدودیت نه دي، نه د چا په حق کې تېری او نه هم په چا ظلم او زیاتی دی. د خبرپاڼې په یوې بله برخه کې راغلي، چې د امربالمعروف او نهې عن المنکر نوي قوانین به په مناسبو لارو پلي شي او د ټولو پر وړاندې به له نرمۍ څخه کار واخیستل شي. د طالبانو ویاند ذبیح الله مجاهد وایي: «د بېلابېلو جهتونو دغه ډول بې ځایه اندېښنې د اسلامي امارت په دریځ کوم اغېز نشي لرلی، ځکه د شريعت د تطبيق او نفاذ لپاره مو بې سارې قربانۍ ورکړي او په دې برخه کې موږ د خپل مجاهد ملت او شهیدانو سپېڅلو ارمانونو ته متعهد یو.»
دا په داسې حال کې ده، چې د طالبانو مشر تېره اونۍ د امربالمعروف او نهې عن المنکر نوی قانون توشیح کړ. په دې قانون کې له محرم او حجاب پرته د ښځو په ګرځېدو بندیز لګول شوی او همداراز د نارینه و پر جامو او ږیرې پر څارنې ټینګار شوی دی. دغه قانون د یوناما په ګډون د بشري او د ښځو د حقونو د فعالانو له پراخ غبرګون سره مخ شوی دی. یوناما په دې اړه د اندېښنې په څرګندولو سره ویلي، چې د طالبانو د نوي قانون له مخې د خلکو د حقونو اخیستل او په دوامداره وېره کې ساتل به د طالبانو او نړۍوالې ټولنې تر منځ جوړجاړی نور هم ستونزمن کړي.
سرچينو د وږي په ٥مه، افغانستان انټرنشنل ته وويل، چې د تېر حکومت دغه نظامي له درېيو مياشتو راهيسې په تخار کې له طالبانو سره بندي دى.
د سرچينو د معلوماتو له مخې؛ طالب وسله والو امر الدين انصاري دوه ځلې مخکې هم نيولى و؛ خو د دغه پخواني نظامي پر وړاندې د کره شواهدو له نه موندلو وروسته خوشې شوى دى.
د سرچينو د معلوماتو له مخې؛ ښاغلى انصاري په کابل کې اوسېږي، خو تېر کال د کار لپاره بدخشان ته تللى و او هلته طالبانو د ده او ملګرو پر موټر بريد کړى و.