د ایران د اسلامي جمهوریت رهبر علي خامنه يي د ایران د ولسمشر مسعود بزشکیان د کابینې له وزیرانو سره وکتل. نوموړي وویل: «ولسمشر له ما سره مشوره وکړه، چې وزیران وټاکو. ځیني هغه او ځینې ما تایید کړل، زه د کابینې ډېری غړي نه پېژنم او نظر مې نه درلود."
د مسعود بزشکیان د کابینې غړو د اسلامي شورا د اعتماد د رایې له تر لاسه کولو وروسته د سې شنبې په ورځ د ایران د اسلامي جمهوریت له مذهبي مشر سره وکتل.
خامنه يي په دې غونډه کې وویل، له وړاندې څخه یې یو شمېر وزیران نه پېژندل او نه یې هم په اړه کوم نظر لري.
هغه د وزيرانو ټاکنه او د پزشکیان له خوا ولسي جرګې ته قناعت ورکول ستره بريا وبلله.
د زمري په ۳۱ مه اسلامي شورا د ولسمشر کابینې ټولو وړاندیز شویو وزیرانو ته د باور رایه ورکړه. مسعود پزشکیان په پارلمان کې تایید کړه، چې د وزیرانو نوملړ د ایران اسلامي جمهوریت د مذهبي مشر په پوره همغږۍ چمتو شوی دی.
پزشکیان ټینګار وکړ، چې هېڅ وزیر د خامنه يي له مشورې او تایید پرته نه دی معرفي شوی.
په ازبکستان کې د امریکا سفیر وايي، د افغان پوځ ۴۶ الوتکې به د ازبکستان تر څارنې لاندې پاتې شي.
په ازبکستان کې د امریکا سفیر جوناتن هینیک ازبک کوون نیوز ورځپاڼې ته ویلي، چې امریکا او ازبکستان د افغان پوځ اړوند د هغو جنګي الوتکو او پوځي چورلکو د وضعیت په اړه موافقې ته رسېدلي، چې د افغان پېلوټانو له خوا په ۲۰۲۱ کال کې ازبکستان ته وړل شوې وې.
د دې پوښتنې په ځواب کې چې ایا دغه الوتکې او چورلکې به په ازبکستان کې پاتې شي، هینک وویل: "دغه پوځي وسایط به په ازبکستان کې پاتې شي، په دې اړه موافقه شوې ده."
هینیک یادونه وکړه، چې ازبکستان او امریکا په دې مساله کې ګډ کار ته دوام ورکوي او زیاته یې کړه: "دا الوتکې او چورلکې هیڅکله د افغانانو ملکیت نه وو، دا د امریکا ملکیت دی. افغان پوځ دغه الوتکې او چورلکې کارولې؛ خو موږ یې تل مالکان وو. "
وروسته له هغه چې د ۲۰۲۱ کال په اګست میاشت کې طالبانو د افغانستان واک تر لاسه کړ، د افغان پوځ ګڼې جنګي الوتکې او پوځي چورلکې د افغان پوځیانو له خوا ازبکستان او تاجکستان ته یوړل شوې.
د ازبکستان د څارنوالۍ دفتر د ۲۰۲۱ کال د اګست په ۱۵مه ویلي وو، چې د افغان وسله والو ځواکونو ۲۲ پوځي الوتکې او ۲۴ چورلکې د ازبکستان له هوايي حریم څخه سرغړونه کړې او دغه هېواد ته ننوتلي دي.
په داسې حال کې چې طالبانو له ازبکستانه د دغو الوتکو د بېرته اخیستو غوښتنه کړې، ازبکستاني چارواکو ویلي، چې له امریکايي لوري سره د یادو پوځي وسایطو د وضعیت په اړه لا هم خبرې روانې دي.