طالبانو په بادغیس کې د ټلویزیونونو خپرونې بندې کړې
طالبانو د امر بالمعروف قانون د ۱۷مې مادې له مخې، په بادغیس ولایت کې د ټلویزیونونو خپرونې او د ولایتي چارواکو د ویډیو او انځورونو اخستل بند کړل.
طالبانو د امر بالمعروف قانون د ۱۷مې مادې له مخې، په بادغیس ولایت کې د ټلویزیونونو خپرونې او د ولایتي چارواکو د ویډیو او انځورونو اخستل بند کړل.
د افغانستان د خبریالانو مرکز وايي، چې په دغه ولایت کې رسنیز فعالیتونه تر غږ او لیکلو محدود شوي.
یاد مرکز د طالبانو پر دغه ګام اندېښنه ښودلې او له دې ډلې یې غوښتي چې په خپل دغه شاتګ پالي دریځ کې بدلون راولي.
یوې سیمه ییزې سرچینې یاد مرکز ته ویلي چې پرون د بادغیس د اطلاعاتو او فرهنګ ریاستد ساکښو موجوداتو د انځورونو د نه خپراوي په تړاو رسنیو ته د یوې اعلایمې په ترڅ کې رسمي خبر ورکړی.
په دې اعلامیه کې چې د خبریالانو ترمنځ لاس په لاس کیږي ویل شوي: « د والي د لارښوونې پر بنسټ او امر بالمعروف قانون ته په پام، له رسنیو او د خپرنیزو ادارو له مسوولانو غوښتل کیږي چې په خپلو خبرونو کې د ساکښو موجوداتو د انځورونو له خپراوي ډډه وکړي او د هغو پرځای کولای شي لوحې، ودانۍ، منظرې او بې سا انځورونه وکاروي».
له دې لارښوونې وروسته ولایتي ملي تلویزیون او د عبور په نامه یوه خصوصي ټلویزیون خپلې خپرونې بندې کړې دي.
د یاد حکم له مخې، د ټلویزیوني خپرونو ویاندویان هم په ساکښو کې شمېرل کیږي، چې د خپرونو او خبرونو وړاندې کول ورسره ناشوني شوي.
د یادې اعلامیې له مخې، د باغیس د ولایتي چارواکو پر تصویري مرکو او انځور اخستنې هم بندیز لګول شوی.
د طالبانو امر بالمعروف وزارت په دې وروستیو کې د افغانستان په ګڼو ولایتونو کې د ساکښو موجوداتو پر انځورونو بندیز لګولی.
