د امریکا ټاکنې؛ ټرمپ په درېیو نویو ټولپوښتنو کې له کمالا مخکښ دی
د امریکا د ټاکنیزو سیالیو په درشل کې په درېیو نویو ټولپوښتنو کې د جمهوري غوښتونکو نوماند ډونالډ ټرمپ د ډېموکراټانو له نوماندې کمالا هرېس څخه مخکښ دی.
د سي این بي سي له خوا په شوې تازه سروې کې چې نن پنجشنبه خپره شوې، پکې ټرمپ د احتمالي رایه ورکوونکو ۴۸ سلنه او هرېس ۴۶ سلنه ملاتړ له ځانه سره لري.
همدا راز د چهارشنبه په ورځ د وال سټریټ ژورنال په نظرپوښتنه کې هم ټرمپ ۴۷ سلنه او کمالا ۵۴ سلنه د احتمالي رایه ورکوونکو ملاتړ له ځانه سره لري.
له دې وړاندې د وال سټریټ ژورنال د ټولپوښتنې مخکښه نومانده کمالا هرېس وه.
د هرېس اېکس/فوربس د یوې سروې له مخې، چې چهارشنبه خپره شوې پکې ټرمپ په ملي کچه د احتمالي رایه ورکوونکو ۵۱ سلنه او کمالا ۴۹ سلنه ملاتړ له ځانه سره لري.
ټاکل شوې، چې د امریکا ولسمشریزې ټاکنې د راتلونکې نومبر میاشتې په ۵مه نېټه تر سره شي.
