طالبانو ته نږدې یوې سرچینې له نومښودنې پرته افغانستان انټرنشنل-پښتو ته وویل، چې د طالبانو حکومت د افغانستان په جنوب ختیزو ولایتونو کې خپل یو شمېر هغه جنګیالي او قوماندانان نیولي چې د "ټي ټي پي" لیکو ته افغان جنګیالي جذبوي.
د دې سرچینې په خبره، په خوست، پکتیا او پکتیکا ولایتونو کې د دې ډلې استخباراتو خپل یو شمېر جنګیالي له دې امله نیولي چې افغان طالبان یې پاکستان او قبایلي سیمو ته د جګړو لپاره بېول.
سرچینه وایي، د دې نیونو په لړ کې د خوست ولایت استخباراتو په مندوزیو ولسوالۍ کې د سنګري په نوم یو مشهور طالب قوماندان هم نیولی دی.
د سنګري په اړه ویل کیږي چې د طالبانو جنګیالي یې د ټي ټي پي او نورو پاکستان ضد وسله والو ډلو لیکو ته جذبول.
طالبان د تشخیص لپاره بایومټریک کاروي
یوې بلې سرچینې افغانستان انټرنشنل ته وویل چې د طالبانو استخبارات د ټي ټي پي په لیکو کې خپل بایومټریک شوي جنګیالي نیسي.
سرچینې وویل، "طالبانو خپل اکثریت جنګیالي بایومټریک کړي. د استخباراتو ریاستونه خپل هغه جنګیالي نیسي چې ګوتې یې په بایومټریک کې راووځي".
په دې وروستیو کې د طالبانو ګڼ شمېر جنګیالي چې له دې ډلې ناراضه شوي او یا د یادې ډلې د تصفیې کمیسیون د پلټنو په بهیر کې له دندو لرې شوي، د مفتي نور ولي په مشرۍ د پاکستان د طالبانو تحریک او حافظ ګل بهادر ډلې سره یوځای شوي دي.
په دې جنګیالیو کې د پکتیا، پکتیکا، خوست، لوګر، غزني او میدان وردګو ولایتونو طالبان شامل دي چې یو شمېر یې د پاکستان له پوځ سره په نښتو کې وژل شوي.
یادې سرچینې افغانستان انټرنشنل- پښتو ته وویل چې د پاکستاني طالبانو شمېر د پخوا په پرتله ډېر شوی او د طالبانو حکومت د اسلام اباد له فشارونو د ځان خلاصي په موخه د خپلو بایومټریک شویو جنګیالیو او سرګروپانو پر نیولو لاس پورې کړی.
سرچینه وایي، " د طالبانو د حکومت یو شمېر مشران د ټي ټي پي له ډېرېدونکي جنګي ځواک نه هم اندېښمن دي ځکه هر طالب چې ناراضه شي مفتي[نورولي] ته ورځي".
د ټي ټي پي لاربلده همکاران
د طالبانو د جلب او جذب پر "یاغي" مسوولانو سربېره هغه کسان هم د طالب استخباراتو تر تعقیب لاندې دي چې له پاکستاني جنګیالیو سره د لاربلدو په توګه ملتیا کوي.
سرچینې له نومښودنې پرته وویل، چې هر پاکستانی جنګیالی پر ډیورنډ کرښه د ۸۵۰ افغانیو په بدل کې اړول کیږي او هر همکار لار بلده کس ته ټي ټي پي د میاشتې ۸۵۰۰ افغانۍ معاش ور کوي.
په سرحدي پوستو کې نوي طالبان
د طالبانو مشر ملاهبت الله اخوندزاده د روان کال په لومړیو کې د خوست، پکتیا او پکتیکا په یو شمېر سرحدي ولسوالیو کې د کندهار، غزني او وردګو ولایتونو اړوند طالبان ځای پرځای کړي چې ظاهرا یې هدف د داعش د نفوذ مخنیوی ګڼل کیږي، خو په کابل کې یوې سرچینې افغانستان انټرنشنل ته وویل چې د دغو جنګیالیو د ګومارنې یوه موخه د پاکستاني طالبانو د فعالیتونو څارل دي.
دغه طالبان د خوست ولایت د علیشیر، ځاځي میدان او ګوربزو ولسوالۍ په سرحدي امنیتي پوستو کې په دندو ګومارل شوي.
سرچینه وایي، چې دې چارې کومه ګټه نه ده کړې ځکه وزیرستاني طالبان په هلمند، کندهار او ارزګان کې د افغان طالبانو په لیکو کې د جګړې پراخه سابقه او ملګري لري.
یاده سرچینه زیاتوي چې" برعکس دوی له ټي ټي پي او نورو بهرنیو جنګیالیو سره له کرښې په اوښتو او د نښتې پرمهال دفاع کې همکاري کوي".
هغه څه چې پوره دوه لسیزې پاکستان د افغانستان د جمهوري نظام پر وړاندې کول، اوس خپله اسلام اباد ورسره مخ دی.
د افغانستان او پاکستان د چارو شنونکي په دې باور دي، چې د ټي ټي پي د کنټرول په برخه کې پر افغان طالبانو د اسلام اباد فشارونو پاموړ پایله نه ده ورکړې او د طالبانو دغه نوی ګام هم ښایي اسلام اباد قانع نه کړای شي.
سرچینه وایي، د طالبانو حکومت هیله درلوده چې د پاکستان د لوی درستیز جنرال عاصم منیر د کاري مودې په پای ته رسېدو له ټي پي سره د خبرو اترو په تړاو ددغه هېواد د پوځ په پالیسۍ کې بدلون وویني، خو د پاکستان د پارلمان د نوې مصوبې له مخې د پوځ د رییسانو د کاري مودې غځولو طالبان له دې اړخه نهیلي کړي دي.
منیر د روان میلادي کال د جنوري پر ۲۵مه طالبانو ته د خبرداري په ډول وویل چې اسلام اباد د هرڅه ځارولو ته چمتو دی. هغه زیاته کړه، " کله چې د پاکستان د یوه وګړي د امنیت او خوندیتوب خبره وي، ټول افغانستان ترې ځارولی شي".
د پاکستان اوسنی لوی درستیز له ټي ټي پي سره د خبرو اترو د مخالف کس په توګه شمېرل کیږي او پوځ ته نږدې رسنۍ دې ډلې ته په دې وروستیو کې د "خوارجو" اصطلاح کاروي.
مایک والټز په افغانستان کې له ۲۰۰۰ تر ۲۰۰۴ کلونو تر منځ د امریکا له پوځ او ځانګړو ځواکونو د افسر په توګه د ترهګرۍ ضد مبارزه او د افغان ځواکونو د مشاور په توګه دندې ترسره کړې.
والټز د امریکا د مرستیال ولسمشر ډیک چیني سره د ترهګرۍ ضد مشاور په توګه هم دنده ترسره کړې، چې هغه د افغانستان لپاره د متحده ایالاتو په پالیسۍ او ستراتیژۍ جوړولو کې ښکېل و.
د امریکا د ملي امنیت سلاکار د امریکا په حکومت کې یو پیاوړی چارواکی وي، چې په امریکا کې د ډېرو لوړ پوړو دولتي چارواکو برعکس د هغه ټاکل د مشرانو جرګې تایید ته اړتیا نه لري.
د تېر کال په سلواغې میاشت کې، د افغانستان د سولې لپاره د امریکا پخوانی ځانګړی استازی زلمی خلیلزاد د کانګرس یوې استماعیه غونډې ته ورغوښتل شوی و، هغه ویلي و چې طالبان د القاعدې او داعش په ځپلو کې بریالي شوي، چې ښاغلي والټز پرې نیوکه وکړه او ویې وویل: «د یوې ترهګرې ډلې د له منځه وړلو لپاره په بلې ترهګرې ډلې تکیه کول خطرناک او لویه تېروتنه ده.»
مایک والتز دا مهال د امریکا د استازو په جرګه کې د فلوریډا ایالت استازی دی او د ډونالډ ټرمپ کلک ملاتړی دی.
۵۰ کلن مایک والټز خپلې پوځي او سیاسي تجربې په خپل یوه کتاب «جنګي ډیپلوماټ: له واشنګټن څخه تر افغانستان پورې د شین خولي سرتیري جګړې» کې خپرې کړې دي.
والټز له افغانستانه د امریکا د وتلو په اړه د جوبایډن پر ادارې سختې نیوکې کوي او دغه بهیر یې «شرموونکی» بللی دی.
هغه د تیر کال په مئ میاشت کې د کانګرس یوې استماعیه غونډې ته دا هم وویل چې طالبان د پخوانیو افغان سرتیرو وژلو او ځورولو ته دوام ورکوي.
دغه امریکايي چارواکي د تېر کال په وږي میاشت کې فاکس نیوز ته ویلي و چې په افغانستان کې القاعده د طالبانو د حکومت او د امریکا د تجهیزاتو په مرسته یو ځل بیا را ژوندۍ شوې او د «بن لادن خوب» یې پوره کړ.
مايک والټز زياته کړه، چې امريکايي ځواکونه به په راتلونکي کې له ترهګرۍ سره د مبارزې لپاره افغانستان ته راستانه شي.
د سرچینې په خبره طالبانو له تېرو دوو ورځو راهیسې د یادو فابریکو د برېښنا د پرې کولو چارې پیل کړي دي.
سرچینه زیاتوي، که څه هم طالبانو تر دې وړاندې فابریکه لرونکو ته ویلي و، چې له اوسنیو بېلونو سره خپل پخواني پورونه هم په قسطونو خلاصولی شي، خو یادې ډلې اوس دغو کسانو ته ویلي، چې باید خپل ټول حسابونه او پورونه خلاص کړي.
له کندهار څخه سرچینې افغانستان انټرنشنل - پښتو ته دغه راز ویلي، طالبانو اوسمهال ان پر هغو فابریکو برېښنا بنده کړې، چې یوازې دوه ورځې وړاندې یې بېلونه راغلي و.
دا په داسې حال کې ده، چې په کندهار ولایت کې د طالبانو د برېښنا حوزوي رياست مطبوعاتي مسوول بیا د دغې ډلې تر واک لاندې باختر خبري اژانس ته ویلي، چې د هغو ۲۲ فابریکو میټرونه قطع شوي، چې تعرفه یې رهایشي وه، خو د برېښنا استفاده په سوداګریزو ځایونو کې کېدله.
نوموړي ویلي، چې له دغو فابریکو څخه د اوو فابریکو د برېښنا مزې له دې امله پرې شوي، چې د میټرونو د ستونزو تر څنګ یې له دوو دورو څخه زیات د برېښنا بېلونه نه وو ورکړي.
په کندهار ولایت کې د طالبانو د برېښنا حوزوي رياست مطبوعاتي مسوول همداراز زیاته کړې ده، چې ځایي مسوولانو تېره اونۍ د فابریکو له مسوولینو سره په کتنه کې له دوی څخه په جدي توګه غوښتي و، چې خپل مخکیني حسابونه ژر تر ژره خلاص کړي.
د افغانستان انټرنشنل - پښتو د سرچینې په خبره، فابریکه لرونکو باید په څلورو قسطونو کې خپل پورونه خلاص کړي وای، خو په دې وروستیو کې فابریکه لرونکو و نه شو کړای خپل پورونه خلاص کړي.
د راپورونو له مخې، ډېری دغه فابریکې د یخ د تولید په برخه کې فعالیتونه لري.
په کندهار ولایت کې اوسمهال شاوخوا ۴۰ فابریکې فعالې دي، چې ډېری یې بیا د طالبانو د حکومت په رامنځته کېدو سره جوړې شوي دي.
طالبانو په داسې حال کې د برېښنا د بېلونو د ورکړې په برخه کې فشارونه زیات کړي، چې د دغې ډلې تر واک لاندې برېښنا شرکت ویلي، چې که د جمهوري نظام پخواني چارواکي او سیاستوال د برېښنا د لګښتونو له درکه خپل پورونه ور نه کړي، د دوی کورونه او شتمنۍ به ضبط کړي.
د یاد شرکت عمومي اجرایوي رییس عبدالباري عمر وویل، چې د تیر نظام پر دولتي ادارو، چارواکو او زورواکانو ۱۳ میلیارده افغانۍ د برېښنا پورونه پاتې چې تر اوسه یې نه دي ورکړي.
د ۲۰۲۲ کال په اکتوبر کې د برېښنا شرکت اعلان وکړ، چې ۶۸۱ میلیونه ډالره پورونه یې راغونډ کړي دي.
دغه پیسې ډیری له پخوانیو سیاستوالو، شرکتونو او سوداګریزو او صنعتي کمپنیو راټولې شوې وې.