د افغانستان په تړاو د امریکا د نوي سیاست د ارزونې په غونډه کې د امریکا د مرکزي قوماندانۍ پخوانی قوماندان جنرال فرانک مکنزي وايي چې امریکا ونه توانېده چې طالبان د سولې موافقې ته مجبور کړي.
نوموړي زیاته کړه چې د افغانستان پخوانی جمهوري دولت هم د سولې لپاره علاقه مند نه و.
د امریکا د پوځ دغه پخواني جنرال د داعش - خراسان ډلې د فعالیتونو په تړاو هم اندېښنه څرګنده کړه او د فعالیتونو د ډېرېدا خبر یې ورکړ.
مکنزي وویل، چې طالبان دې له القاعدې سره له مبارزې پرته په رسمیت نه پېژندل کیږي او په دې برخه کې باید ګامونه واخلي.
هغه وویل، چې له افغانستان نه د ټولو ځواکونو اېستل سم نه وو او د امریکا په دولت کې لومړنی توافق په افغانستان کې د ۲۵۰۰ سرتېرو ساتل وو، خو باید د ۲۰۲۱ کال د اپریل په نیمايي کې تصمیم ونیوه چې ټول ځواکونه و اېستل شي.
فرانک مکنزي وايي، په افغانستان کې جګړه له ترهګرو ډلو سره د مقابلې لپاره اړینه وه او په خبرو اترو کې د افغانستان د دولت نه شریکول تېروتنه وه.
مکنزي وویل امریکا باید وسله والو ته اجازه نه وای ورکړې، چې په پاکستان کې پناه واخلي.مکنزي زیاته کړه: «موږ په افغانستان کې پوځي تېروتنه وکړه. موږ باید اسامه بن لادن مخکې وژلی وای»،
هغه له افغانستان نه بهر د طالب وسله والو پټنځايونو ته په اشارې سره وویل، «پاکستان په ډیر خطرناک حالت کې و».
د سنټکام پخواني قوماندان زیاته کړه، چې امریکا په افغانستان کې د ترهګرۍ پر وړاندې د مبارزې لپاره د دولت جوړونې پرېکړه کړې وه. هغه په افغانستان کې د دولت جوړونې پرېکړه یوه تېروتنه وبلله.
د هغه په وينا، د امريکا د وتلو لامل دا و، چې دوو امريکايي ولسمشرانو له افغانستان نه د وتلو هوکړه وکړه.
هغه وویل، «امریکا نه غوښتل چې د ماتې په اعلانولو سره له افغانستان څخه ووځي خو په پای کې د جګړې بڼه بدله شوه».
